Footer

Hostage taking: Chavit, naidayaw, nababalaw

NAIDAYDAYAW ken nababalaw ni Governor ken senatorial candidate Luis “Chavit” Singson gapu iti ibaballaetna iti hostage taking dagiti 26 nga agbasbasa ken dua a mangisursuro iti Musmos Daycare Center iti Baseco Compound, Tondo, Manila itay Marso 28.

Naidaydayaw ni Singson gapu iti “kinaturedna a nangipusta iti biagna tapno makatulong iti pannakaisalakan dagiti day care pupils” a hinostage ni Armando “Jun” Ducat, maysa a kontratista, a kaduana ni Caesar Carbonell.

Nababalaw met ni Singson gapu iti mapapati a panangluganna iti insidente para iti publisidad.

Nagpaut ti hostage taking iti 10 nga oras a nangrugi iti alas nuebe ti bigat ken nagpatingga iti apaglabes ti alas siete iti rabii kalpasan a winayawayaan ni Ducat dagiti ubbing babaen ti pannakinegosiasion ti gobernador.

Nakabalud ita da Ducat ken Carbonell ket napilaanda iti kaso nga illegal detention ken illegal a panagikut iti paltog ken eksplosibo.

Nababalaw ti kapolisan iti Manila gapu iti pannakapalubos da Singson ken Sen. Bong Revilla a nakibiang bayat ti hostage taking.

Ngem kinuna ni Singson a “kapilitan a nagtignay tapno maisalakan dagiti ubbing” idinto nga innayonna a napan  iti nasao a lugar gapu iti tawag ni Carbonell.

Kinuna pay ni Singson nga idi napan iti lugar ti hostage taking, dina pinanunot a mabalin a makritikar gapu iti maipagarup a panangluganna iti insidente no di ad-adda a napanunotna a napatpateg  a maisalakan dagiti ubbing.

Kinuna ni Singson a nupay maawatanna ti intension ni Ducat, saanna a kanunongan ti illegal a wagas a panangipeksana iti demandana.