Footer

Nakasuan, kameng ti sindikato agiwarwaras iti peke a kuarta

CANDON CITY – Naipilaan iti kaso iti city prosecutor’s office ditoy ti maysa a lalaki a mapapati a kameng ti sindikato nga agiwarwaras iti peke a kuarta.

Napilaan ni Dionisio Dimaandal, 36, naasawaan, taga-Novaliches, Quezon City, iti illegal possession of false treasury or bank notes iti prosecutor’s office ditoy babaen ti information sheet no. 07-609, kas maibatay iti reklamo ni Adonis Fernandez, negosiante, residente iti Rizal St., Vigan City.

Tiniliw ti polis itay Marso 23 ni Dimaandal kalpasan ti pananggandatna nga ipasupli ti P1,000 a peke a kuarta ken ni Fernandez.

Segun iti polis, simrek ti suspetsa nga adda kaduana iti sarisari store ni Fernandez ket gimmatangda iti 5 a lata ti pineapple juice, maysa a ream ti Philipp Morris, 4 a lata ti corned beef ken sardinas nga agpateg amin iti P538.

Nabukel a P1,000 ti impasupli ti suspetsa.

Inaresto dagiti polis ti suspetsa ngem nakalibas ti kaduana.

Bayat ti pannakapalutpotna, nakakumpiska dagiti inbestigador iti sabali pay a peke a P1,000 a naikabil iti petaka ti suspetsa.

Di pay ammo ti kinaasino ti kumplot ti suspetsa.

Idi kanikadua a bulan, nagraira ti bogus a P500 iti Baguio, Pangasinan, La Union ken ditoy probinsia.

Nasukalan dagiti peke a kuarta bayat ti pannakarambak ti Panagbenga Festival, iti maysa a galiera iti Pangasinan ken naigatangda iti sumag-mamano a pagtagilakuan iti rehion I.

Kangrunaan a pakailasinan ti peke a P500 ti urnos dagiti balikas iti makannawan ti rupa ni nag-senador Benigno Aquino, Jr. Iti peke a kuarta, nailanad ti “Faith in God and faith in our people” idinto nga immuna ti “people” iti husto a kuarta.

Iti peke a kuarta, di nalawag ti watermark, kasungani ti husto a kuarta a nalawag a makita no ipasir iti lawag.

Comments are closed.