Footer

Pork barrel dagiti agilinlinteg, nadoble, haleluya!

Iti baet ti manamnama a pannakababalawda, ingngato dagiti agilinlinteg ti alokasionda iti pork barrel iti national budget para iti 2007, dandani kagudua ti dimmakkelanna iti naited kadakuada itay napan a tawen.

Mismo a kinumpirmaran ni Budget Secretary Rolando Andaya, Jr. a manipud iti P6.240 bilion, napagbalin a P11.445 bilion ti Priority Development Assistance Fund (PDAF) wenno nalatlatak iti naganna a pork barrel iti babaen ti P1.126 trillion a budget para ita a tawen.

No patien ni Andaya, awan ti pannakaammo ti Malakaniang iti dandani nadoble a PDAF ti Kongreso. Awan (kano) ti pannakaibiangda iti reconciliation negotiations iti bicameral conference committee nga indauluan da Sen. Franklin Drilon ken ni Albay Rep. Jose Ma. Salceda, chief of staff itan ni Pres. Arroyo.

Kasta met nga ipapati ni Andaya a saan a maaramat ti pundo para iti masungad nga eleksion agsipud ta naipasdek ti moratorium iti pannakaruk-at dagiti PDAF iti kangitingitan ti kampania iti eleksion ken adda election ban dagiti trabaho iti publiko.

Nupay uray kasano panangikalintegan ni Andaya, saan a maikkat ti suspetsa a maaramat dagiti pundo para iti daytoy nga eleksion agsipud iti kapaliiwan kadagiti naglabas nga eleksion.

Kas iti mapapati a pannakaaramat ti pundo ti pork barrel para iti agrikultura a kakuyogna ti alegasion a dagiti politiko nga asideg iti turay ti kangrunaan a nabenepisiaran imbes a dagiti koma mannalon a nakaisangratanda.

Agingga ita, awan pay ti paglawagan ti mapapati a fertilizer scam a nakaisangkotan ti maysa a nangato (idi) nga opisial ti turay.

Makadakes, naggapu ti pundo a nainayon iti pork barrel dagiti madaydayaw nga agilinlinteg manipud iti retirement pay dagiti empleado ti gobierno nga agretiro iti daytoy a tawen 2007.

Kayatna ngarud a sawen nga awan ti nailatang a pundo a pagretiruan dagiti empleado ti turay gapu ta naakas metten a pangnayon iti pork barrel dagiti agilinlinteg.

Kaasida pay. Iti las-ud ti pinullo a tawen, inkaradapda ti nagtrabaho iti ikub ti gobierno, ket ita ta sagrapenda metten iti panagretiroda, awan met gayamen ti pundo a nailatang para kadakuada ta kinirausanen dagiti boklis a politiko.

Di masaaw nga iti baet ti kinababa ti sueldoda kas intuyang ti linteg, aggasto ti maysa a politiko iti pinullo no di pay ginasut a million tapno laeng mangabak iti eleksion.

Comments are closed.