Footer

Ti rangtay iti Dulon (Maudi a paset)

INKEDDENG ni Marlon ti agawid. Saan pay met laeng a papanawen ti bangko. Ngem ammona, no saan a makabayad, maremata ti balay ken lote. Wenno papanawen ti nakagatang. Sadino koma ti pangalaanna iti pangdundonna iti balay ket ultimo dos pesos a tinapay ket di pay makagatang?

Ngem anian a siddaaw ni Marlon iti naimatanganna.

Maysa a hardin ti dulon.  Napintas ti landscapena.  

Daydi nauneg ken nalawa a kanal iti nagbaetan ti dulonda nga agkabsat ket addaan kadagiti nagarko a rangtay. Namulaan iti masetas ti ngarab ti kanal ken aglawlaw. Makaay-ayo dagiti sabongda. Naurnos dagiti mahogany nga agaadayo iti agarup uppat a metro. Addan danum ti kanal a pagay-ayaman dagiti adu nga itik ken pato. Naalud-alud payen nga isu ti pupokan ti tilapia ken paltat. Adda dagiti swing, seesaw ken indayon iti laong ni Tony. Makitana ti narnuay ken namaris a panagtayab dagiti kulibangbang ken tuwato.

Nagtakder ni Marlon iti sangi ti maysa kadagiti rangtay. Iti panangbuybuyana dagiti annak ni manongna nga agaayam, inutobna met ti taray ti panagbiagna. Apay a dina met napanunot ti maaddaan iti pamilia? Apay a ti sugal ti impangpangrunana iti biag? Awanen ti sanikuana.

Mabain unayen iti bagina. Makasangit. Agbabawin. No la koma tinungpalna ti manongna, saan koma a kastoy ti kinamiserable ti panagbiagna. Saan koma a nadadael ti sanikuana.

Ti nariknana a kuldit ti puyupoy ket saanna a kinabaelan ti sippit ti nakatangkayagen nga init. Musika iti panagdengngegna kadagiti billit nga agalis-alis kadagiti sanga dagiti kaykayo iti aglawlaw, ngem ammona a saan a para kenkuana dagita no di ken ni manongna ken ti pamiliana.

Nakarikna iti bara iti barukongna. Nagtallikud. Nagna. Lima ngata nga addang idi napukkawan ti naganna.

Nagsardeng. Timmaliaw iti likudanna. Ni manongna a nakatanggaya dagiti dua nga imana.

“Umayka ditoy!” kuna daytoy nga agkatkatawa.

Saanen a makalisi pay. Kas iti sugal, adda pannakaabak ken panangabak. Itoy a gundaway, inabak manen ni manongna. Naabak ti prinsipiona iti biag.

“Hustoka, manong. No la koma pinatika idi,” kinuna ni Marlon a nakadumog.

Agkatkatawa ni Tony. “Umayka man ditoy, umasidegka kaniak!”

Immasideg ni Marlon ket inarakup ni Tony.

“Nupay nagaramidka iti kanal iti nagbaetanta, rangtay met ti inaramidko tapno kanayon latta ti inta panagsabat…”

Saan a nakatimek ni Marlon.

“Iti kaanoman, ading, saanka a baybay-an. Sikanto latta ti kabsatko.”

“Mapakawannak, manong, iti laksid ti amin?”

“Wen, apay ketdi a saanen? Iti kaanoman, saanka a ginura. Ngem naan-anay ti ragsakko no agbalbaliwka.”

Nakasangit iti ragsakna ni Marlon ket inkarina ti panagbalbaliwna.

SEMANA manen. Intay manen lagipen ken sarmingan ti kabibiag ti Mannubbot.

“Inka idiay daga, ket isalakanmo dagiti kakabsatmo, dimo baybay-an ida,” kuna ti Namarsua isu nga imbaonna ni Jesucristo.

Kabsattayo ni Jesucristo. Iti kaanoman, saannatayo a baybay-an.

No maminsan, agserbi met a rangtay ti semana kadatayo a managbasol. Ti rangtay a disenio ti Namarsua ti dalan iti intay panagsubli kenkuana.

Nabangad ken barisuwweng ngamin ti tao. Kas ken ni Marlon iti istoria. Nangaramidtayo iti kanal a mamangaddayo kadatayo iti Namarsua. Dayta a kanal nga inaramidtayo ket isu met laeng ti nangisina kadatayo iti Namarsua.

Ngem saan a mabubos ti panagayat ti Namarsua. Nangaramid ketdi iti rangtay kadagiti kanal ti basbasol tapno iti aniaman a panawen a kayattayo nga agsubli iti ikubna ket makasublitayo.

Maibilang a maysa kadagiti rangtay ti semana. No adda pay dagiti saan a nakasubli iti ikub ti Namarsua, nasken nga agpanunoten. Iti ungto ti rangtay, nakaukrad ken nakatanggaya dagiti nabileg unay a takiag ni Jesucristo a sidadaan kadatayo a mangabrasa.

Talaytayem ngaruden dagiti rangtay iti dulon tapno nanamem ti imbag ken pia iti hardin

Naragsak a Lawas ti Semana kadakayo amin…!

Comments are closed.