Footer

31st batch grads ti UNP College of Law, nakaruar iti bar exams

VIGAN CITY – Tallo a damo a pinagraduar ti College of Law ti University of Northern Philippines ti nakaruar iti 2006 bar examinations.

Nainaganan dagiti tallo a kabarbaro nga abogado a da Edwin Concepcion, Jr. ti Santa Maria, Ilocos Sur; Jonathan Florentino ti Tamag, Vigan City; ken ni Gerwin Rabang ti Pantay Fatima, Vigan City.

Kinuna ni Dean ti UNP College of Law Atty. Ma. Elena Cardinez a maragsakan iti nasayaat a passing rate iti umuna a batch a pinagraduar ti law school nga idauluanna.

Kinuna ni Cardinez a very rare nga adda programa ti medisina ken law iti maysa nga state university ket kadagiti adda kastoy a programada, nababa ti showingda iti eksaminasion ket iti adu a tawen, awan ti pimmaspasa.

Agdagup iti 19 ti first batch a nagturpos iti abogasia iti UNP. Iti daytoy nga eksaminasion, nakagun-od ti nasao a kolehio iti aganay 20% a passing rate.

Kinuna ni Cardinez a napintas daytoy a pangrugian ti pagadalan ta 30% ti national passing rate.

Ita a tawen, agdagup iti 6,187 dagiti nageksamen ket 1,893 dagiti nakaruar.

Taga-Baguio City, ni Noel Neil Malimban ti topnotcher iti bar exams babaen ti rating a 87.6%. Nagturpos ni Malimban iti University of the Cordilleras (Baguio Colleges Foundation idi) iti nasao a siudad.

Idi masaludsod no ania ti riknana, kinuna ni Malimban a dina ninamnama nga isu ti topnotcher agsipud ta narigat ti eksaminasion.

Idi 2000, maika-14 iti licensing examination para kadagiti accountants ni Malimban.

Sabali pay a nagturpos iti abogasia iti UC, ni Janet Abuel, ti topnotcher iti bar exams idi 1998.