Footer

Cabugao, Cervantes, masipsiputan nga areas of immediate concern

VIGAN CITY – Dua nga ili ti masipsiputan nga areas of immediate concern iti masungad nga eleksion gapu kadagiti insidente nga adda pakainaiganna iti politika a napasamak kadagitoy nga ili iti napalabas.

Imbunannag daytoy ni PNP Assistant Provincial Director Supt. Crispin Agno bayat ti Talakayan sa Isyong Pulisya a naangay iti conference room ti Vigan City police station a dinar-ayan dagiti hepe ti polisia iti umuna a distrito ken sumagmamano a kameng ti media.

Kinuna ni Agno a masipsiputan ti Cabugao ken Cervantes a hot spot iti masungad nga eleksion agsipud ta adda dagiti napasamak nga insidente iti eleksion idi 2004 a nainaig iti politika.

Kanaig daytoy, impakaammo ni Agno a nakakumpiska ti kapolisan iti 15 a nadumaduma ti kitana nga armas kas paset ti kampania ti PNP a panangpukaw kadagiti agraira nga illegal nga armas iti probinsia.

Segun iti assistant provincial director, napilaanen iti kaso a panaglabsing iti pammilin ti Commission on Elections nga election gun ban dagiti natiliwan iti paltog.

Naammuan pay bayat ti kumperensia a ngimmato iti apagapaman laeng ti napasamak a krimen iti probinsia manipud Enero agingga iti Marso iti daytoy a tawen no maikumpara iti isu met laeng a tiempo itay napan a tawen.

Adda 97 a nairekord a krimen a napasamak iti umuna a tallo a bulan ita a tawen idinto a 94 itay napalabas a tawen manipud Enero agingga iti Marso.

Kinuna ni Agno a nangipasdeken ti PPO iti provincial election monitoring center a mangsiput kadagiti aktibidad iti politika iti probinsia tapno malapdan dagiti insidente a mangriribuk iti eleksion.

Sakbayna, naisayangkat itay Abril 1iti sibubukel a probinsia ti panagpipinnirma dagiti kandidato iti peace covenant para iti nadalus, naurnos ken natalna nga eleksion.

Nagkikinnamayyetan ti Commission on Elections, PNP ken ti Simbaan daytoy a gannuat.

Comments are closed.