Footer

Ilocos Norte, San Nicolas, kampeon iti Tobacco Festival

CANDON, Ilocos Sur – Nagkampeon ti Damili Festival Street Dancers ti San Nicolas, Ilocos Norte iti street dancing competition and showdown iti Tobacco Festival a naangay itay Marso 28 ditoy.

Imbalat ti Damili Street Dancers dagiti sangapulo a kinabalubalna a naggapu iti La Union, Baguio ken ditoy met laeng probinsia ket inyawidda ti P50,000 a premio.

Ti Filipiniana a kawes nga abel a naramenan iti tema iti tabako, ken iti pintas ti lunglung-ayda ti nangibayog iti San Nicolas a kalaingan iti streetdancing iti panangrambak daytoy a siudad iti panagpiestana.

Inyalat dagiti street dancers ti Balaoan, La Union ti maikadua a gunggona babaen ti laingda nga agsala ken iti suotda a maiyannatup iti maris ken kultura dagiti mannalon nga Ilokano ket immawatda iti P30,000 a premio.

Maikatlo a gunggona (P20,000) ti inyawid dagiti estudiante ti UCC iti San Fernando, La Union.  Impangabak ti UCC street dancers ti naparagsit a salada agraman ti makapaalino a kawesda.

Comments are closed.