Footer

Iti politika iti Ilocos Sur – Singson latta

VIGAN CITY –  Dominante latta dagiti ag-Singson ti politika iti Ilocos Sur,.

Iti tay-ak ti politika iti probinsia, ni pay laeng Gov. Luis “Chavit” Singson ti kingpin iti las-ud ti nasurok a tallo a dekada manipud idi imbalatna ni naggobernador Carmeling Pichay Crisologo, asawa daydi nag-diputado Floro Crisologo, langilangan a politico a nangibagi ti umuna a distrito ti Ilocos Sur.

Malaksid iti sumagmamano a tawen idi kaim-implementar ti Linteg-Militar a nakaipatugawan ti OIC a nangsukat kenkuana a mangituray iti probinsia, ganggannaeten ti pannakaabak iti eleksion ken ni Gov. Singson.

Ita, agkandidato ni Singson a para senador. Iti damo a surbey, adda iti maika-50 a ranggo, sa itay Marso, kalpasan iti panagipilana iti kandidaturana, limmagto iti maika-25.

Kalpasan ti hostage taking dagiti 26 a day care pupils nga isu ti maysa kadagiti kangrunaan a nakinegosiar para iti pannakawayawayada, manamnama a ngumato pay ti ranggo ni Chavit Singson.

Itay nabiit, inrusat dagiti supportersna ti propaganda a 258. Kayatna a sawen, panangipagnada iti itatayok ni Singson manipud iti maika-25 a puesto iti maikawalo a puesto para iti Senado.

Nupay kasta, uray iti panangpanaw ni Singson iti kinagobernador para iti nailian a puesto, namaymayengmeng itan ti kayo nga immuna nga intukit daydi Maestro Joseling Singson nga amana a nagmaymayor iti ili a Vigan, ken maysa a nakipagrangen daydi naggobernador Evaristo “Titong” Singson a kabsatna.

Natenneben a politiko ni Bokal Jeremias “Jerry” Singson, sabali pay a kabsatda. Ita a panagpipili, kandidato ni Jerry a para bise gobernador iti babaen ni Bise Gobernador Deogracias Victor “DV” Savellano, a pili ni Chavit Singson a mangsublat kenkuana.

Kandidato met a para congressman ni Senior Board Member Ronald Singson, anak ni Chavit. Manamnama a ni Ronald ti mangibagi iti umuna a distrito iti Kamara agsipud ta maibilang nga awan ti nagan ken makinaria ti kasangona.

Agsubli iti politika ti sabali pay a Singson, ni dati a Mayor ti Vigan City Eva Marie Singson-Medina, anak daydi naggobernador Titong. Sublatenna ti puesto a kinamayor manipud iti asawana, ni Mayor Ferdinand C. Medina.

Ni Ferdinand ti simmublat a nagmayor iti Vigan idi naturpos ni Eva ti maikatlo a terminona kas ina ti ili ken siudad ti Vigan.

Awan kasango ni Eva ta awan ti timmakder a sumango kenkuana, ken timmiponen iti bunggoyna dagiti kameng ti oposision a pakaibilangan ni dati a bise mayor ken city veterinarian itan Dr. Liborio Arca ken ni dati a Konsehal George Villanueva.

Kandidato itan ni Villanueva a para konsehal iti babaen ti Lakas-CMD, partido ni Eva.

Saanen nga agpailayon kas city councilor ti sabali pay a Singson, ni Konsehal Germie Singson-Goulart ngem tumaray a para mayor iti Caoayan, Ilocos Sur.

Iti maikadua a distrito, dagiti ag-Singson latta ti ari-ari iti politika.

Agpailayon ni Dip. Eric Singson ket maiyarig ti kasalipna iti politika a kikit laeng iti batido a diputado.

Agpailayon met ni Mayor ti Candon City Allen Singson. Kas iti amana, awan ti makita a risiris nga ited ti kasangona.

Sabali pay a Singson, ni Konsehal Alfonso Singson, ti agpailayon a city councilor iti Candon City.

Agtultuloy ngarud ti Ilocos Sur a Singson country.

Comments are closed.