Footer

Karit iti kampania ti turay kontra panagkunniber

Iti sanguanan ti alegasion a ti Pilipinas ti maysa kadagiti pagilian a pagrarairaan iti panagkunniber, masipsiputan ti pagdur-asan ti rekomendasion ti Ombudsman Visayas a maimbestiga dagiti nangato nga opisial ti Department of Public Works and Highways, dagiti mayor iti Lapu-lapu City ken Mandaue City ken dagiti opisial ti departamento ti inhinieria dagitoy tallo a siudad mainaig iti mapapati nga overpricing dagiti nainstolar nga streetlights para iti Association of Southeast Asian Nation leaders summit a naangay idi Enero daytoy a tawen.

Kitaentayo dagiti sumaganad a limtuad iti panagimbestiga ti Ombudsman Visayas mainaig iti sobra ti nginana a lamp posts ken dadduma a streetlamps a nakagastuan ti gobierno iti ginasut a million.

  • Segun iti dokumento nga indatag ti DPWH iti Ombudsman Visayas, iti 724 a decorative lamps ken 248 nga streetlights a nainstolar iti Lapu-Lapu City, immabut ti nagasto iti P174.8 milion; iti 453 decorative lamps ken 202 streetlights a naipasdek iti Mandaue City, nabusbos ti P130.02 milion; iti 683 decorative lamps iti Cebu City, nabusbos ti P61.050 milion.
  • Segun pay iti dokumento, agpateg laeng dagiti lampposts a naangkat pay iti China, manipud iti P1,400 agingga iti P11,750, ngem nailako iti DPWH iti P50,000. Limmobo ti pateg dagiti lampposts manipud iti P83,000 iti P350,000 idi maipatong iti unit  price ti instolasion ken dadduma pay a nagbusbosan.
  • Naduktalan iti inbestigasion nga agpada ti program of works para iti proyekto ken ti bid nga indatag dagiti nangabak a kompania, banag nga imposible a mapasamak, segun iti Ombudsman fact finding committee. 
  • Para kadagiti nasao a lampposts ken streetlights, nakabusbos ti gobierno iti P365.8 milion, nangatngato nga amang ngem iti ibagbaga ti DPWH a nagasto a P120 milion.

Dakkel a pakaibabainan ti gobierno daytoy nga anomalia a mapapati a kinasangkotan dagiti opisial ti DPWH, inhiniero ken local city executives agsipud ta naipasdek dagitoy a proyekto tapno laeng agbalin a makaay-ayo iti imatang dagiti siudad a nakaangayan iti ASEAN leaders summit. Agballatek la ketdi iti gobierno dagiti saan a makaay-ayo a damag a pinarnuay dagiti mapapati nga anomalia iti implementasion dagiti proyekto.

Kasapulan nga ipakita ti turay a saan laeng a puro balikas ti kampaniana kontra iti panagkunniber no di babaen iti aramid.

Kas umuna nga addang, rumbeng laeng a madusa asinoman a nagbasol iti daytoy maanomalia ken sobra unay ti nginana nga streetlights ken lampposts.

Gundaway daytoyen ti turay a mangipamatmat a natibker ken napinget ti kampaniana maikontra iti panagkunniber uray nangangato nga opisial ti madunggialan. No palusposanna daytoy a gundaway, ad-addan a mapukawna ti nabatbati pay a kredibilidadna kadagiti umili.