Footer

Mayor, bise mayor, kokonsehal iti tallo nga ili, awan kasangoda

ILOCOS SUR – Awan kasango dagiti kandidato a para mayor, bise mayor ken kokonsehal ti Lakas-Christian Muslim Democrats (Lakas-CMD) iti tallo nga ili ditoy probinsia iti masungad nga eleksion.

Segun iti opisial a listaan dagiti kandidato manipud iti opisina ti Commission on Elections provincial office, awan kasango da Mayor Arlyn Favis ken Bise Mayor Alfonso Favis, Jr. iti Magsingal, Mayor Jose Tabanda III ken Vice Mayor Nancy Tabanda iti San Vicente, ken Mayor Leonofre Gironella ken Vice Mayor Leopoldo Gironella iti Salcedo agraman dagiti katiketda a kandidato para konsehal kadagiti nadakamat nga ili.

Daytoy ti umuna a gundaway iti pakasaritaan iti politika iti probinsia nga awan a pulos ti kasango dagiti mayor, bise mayor ken kokonsehal iti eleksion.

Iti Vigan City, awan ti timmakder a sumango ken ni dati a Mayor Eva Marie S. Medina iti panagsublina nga agkandidato para iti puesto a tinugawanna iti tallo a termino.

Kas ninamnama, impabus-oy ni Mayor Ferdinand C. Medina iti kaingungotna ti panagsublina iti politika ket agsubli iti private sector.

Kabayatanna, sumagmamano pay a mayor ti awanan iti kasalipda iti masungad nga eleksion a pakaibilangan da Mayor Roque Verzosa, Jr. (Tagudin), Mayor Virgilio Valle (Sta. Cruz), Mayor Ferdinand Hernaez (Sta. Lucia), Mayor Erlinda Gaerlan (Sigay), ken Mayor Lorenzo Bragado, Jr. (San Emilio).

Iti sabali a bangir, 10 a kandidato a para bise mayor a pakaibilangan ti pailayon a bise mayor iti Candon City ti awan met ti kasangoda ita nga eleksion.

Mairaman ditoy da Vice Mayor John John Reyes (Sta. Maria), Vice Mayor Alfonso Favis, Jr., (Magsingal), Vice Mayor Nancy Tabanda (San Vicente), Vice Mayor Rodrigo Romano (Sta. Cruz), Vice Mayor Estrella Hernaez (Sta. Lucia), Vice Mayor Rodrigo Bolesa Reyes (San Emilio), Sherwin Tomas (Lidlidda), Vice Mayor Simeon Wandas (Sigay) ken Vice Mayor Leopoldo Gironella (Salcedo).

Iti Candon City, adda simmango ken ni Mayor Allen Singson iti kinatao ni Wilfredo Virocel, independiente, ngem awan ti nangidatag iti kandidaturana kontra ken ni Vice Mayor Nestor Itchon.