Footer

Ridaw ti balay ti kandidato, dinungpar ti bus

SAN ESTEBAN, Ilocos Sur – Dinungpar ti maysa a bus ti ridaw ti pagtaengan ti maysa a mayoral candidate ditoy a nakaigapuan ti pannakasugat ti lima a tattao iti parbangon ti Abril 1.

Nakaro ti dadael ti gate ti pagtaengan ken agpapaay a Kampi headquarters ni sigud a Mayor Chester Elaydo iti San Nicolas, ditoy nga ili kalpasan a dinungpar ti Viron transit nga addaan plaka AVK-733 ken body number 2380 a minaneho ni Carlito Mabalay, residente iti barangay Buno, Matatalahib, Tarlac City.

Nasugatan ti  drayber agraman da Edmund Pamani, 46, konduktor ti lugan; Basiliza Alicia Trinidad, 46, residente iti Baguio City; Ernie Banbero, 18, residente iti San Isidro, ken ni Joy Escudero, residente iti Poblacion, ditoy; agpapada a pasahero iti nasao a bus.

Naammuan iti inisial nga inbestigasion a dumsaag koman a ni Escudero ta asidegen iti pagsardenganna  ngem madi nga agsikko ti lugan iti kurba-serrada a puon ti pannakaidungparna iti ridaw iti sanguanan ti pagtaengan ni Elaydo.

Naitaray dagiti biktima iti Reyes Clinic and Hospital iti Sta. Maria para iti pannakaagas dagiti sugatda.

Comments are closed.