Footer

4 mannurat iti Tawid, nangabak iti salip

CURRIMAO, Ilocos Norte – Uppat a  mabigbigbig a mannurat nga agsursurat iti  Tawid News Magasin ti immawat iti pammadayaw iti national convention ti Gumil Filipinas a naangay iti Currimao, Ilocos Norte gapu iti panangabakda iti pasalip iti sarita ken daniw itoy a tawen.

Aganay a 200 gasut dagiti mannurat nga Ilokano manipud iti nadumaduma a paset iti Kailokuan ken iti ballasiw-taaw ti timmabuno iti nasao a konbension.

Nangabak ni Danilo Antalan, ace reporter ti DZTP radio, Candon City ken contributing writer ti Tawid News Magasin iti umuna a gunggona iti 3rd Sta. Rafaella Community Salip iti Makapasangit a Sarita babaen ti saritana a “Pamilia.”

Immawat ni Antalan iti P12, 000.00 ken sertipiko ti pammadayaw.

Dua a premio ti inyalat ni Ariel S. Agcaoili, maikadua iti Salip ti Daniw iti RFAAFIL 2007 babaen ti daniwna a “Barangabang” ken maikatlo a gunggona iti Salip ti Sarita iti RFAAFIL 2007 babaen ti saritana nga “Ayat iti Panawen ti Ariangga”. Immawat ni Agcaoili iti P1,500 ken P5.000.00 a premio  ken sertipiko ti pammadayaw.

Agdama a mangisursuro ni Agcaoili iti University of Hawaii iti Manoa.

Inyalat ni Jobert M. Pacnis ti Ballesteros, Cagayan ti umuna a gunggona iti Salip iti Daniw ti RFAAFIL 2007. Impangabak ni Pacnis ti daniwna a “Sapulem ti Kulluong” ket immawat iti P2, 000.00 a premio ken sertipiko ti pammadayaw.

Agdama a mangisursuro ni Pacnis iti Cagayan Colleges Foundation, Inc.

Maikatlo a gunggona  ti inyawid ni Roy Aragon babaen ti daniwna nga “Essem” iti met laeng salip iti daniw ti RFAAFIL 2007 ket immawat iti P1, 000.00 ken sertipiko.

Agdama a computer specialist ni Aragon iti St. Paul University, Tuguegarao City.

Comments are closed.