Footer

Chavit, 3 kaduana, nadundunor gapu pannakaikras luganda iti bantay

VIGAN CITY – Kinuna ni Governor ti Ilocos Sur ken senatorial candidate Luis “Chavit” Singson a nagasat ta nalasatanna ti sabali pay a peggad ti biagna gapu iti pannakaikras ti helicopter a naglugananna ken dagiti kakaduana.

“No makitam diay helicopter, kasla awan ti agbiag ta nalukotlukot… nakakaskasdaaw no kasano ti iruruarmi a sibibiag,” nakuna ti gobernador.

Naikras ti nagluganan a helicopter ni Singson, kaduana ti maysa a retratista, security aide ken ti piloto, ni Diosdado Lumanlan, iti Mt. Polis, Bontoc, Mt. Province iti malem ti Abril 9. Kagapgapuda iti maysa a festival iti Lagawe, Ifugao.

Naglak-am ni Singson iti dunor iti muging ken sakana kasta met a nasugatan dagiti kaduana.

Segun iti gobernador, idi aggawiddan, nayaw-awan ti piloto ket idi mapanda iti bangir ti bantay, napuskol unay ti angep, awan pulos ti makitada isu nga inyatras ti piloto ti luganda.

“Idi agatras nga agdisso koma, saanna a nakontrolen, natnagkami iti rangkis ket natulidtulid diay helicopter,” kinuna ni Singson idinto nga innayonna a nasayaat laeng ta naisab-itda iti kayo ket saanda a nagtuloy a natnag iti baba.

Kinuna ti gobernador nga addada amin iti uneg idi natulid ti lugan a puon ti nakadundunoranda nga agkakadua.

Naammuan manipud iti gobernador a kalpasan ti kras, immarayat dagiti agindeg a nangtulong kadakuada. Impan dagiti agnaed da Singson iti maysa a klinika iti Banaue tapno maagasan ti sugatda.

Kabayatanna, kinuna ni Air Transportation Office Chief Nilo Jatico a kitaen ti opisinana no apay a naikras ti helicopter a nagluganan ni Singson.

“Pakaammuanminto dagiti operators. Agsipud ta daytoy ti kaadduan a maar-aramat a transportasion ita, mabalin nga adda panagsalungasing kadagiti safety standards,” nakuna ni Jatico.

Sakbayna, idi Abril 7, naikras ti helicopter a mapapati a nagluganan ti campaign staff ni partylist candidate ken dati nga Army General Jovito Palparan iti maysa a balay iti San Pablo City.

Mapapati a nadadaelan iti makina ti nasao a lugan ket nagkras iti balay da Nicanor ken Aleli Chayla.

Awan ti nadunor iti nasao nga insidente.

Kinuna ni Singson a kinunkuna dagiti panglakayen a ti agimatna ti nangisalakan kenkuana ngem inyunay-unayna a “nakem amin ni Apo Dios” idinto a nagyaman ta inikkan manen ti Dios iti baro a biag.

Itay napan a bulan, linaon dagiti pagiwarnak ni Singson gapu iti pannakinegosiarna para iti pannakawayawaya dagiti 26 a day care pupils ken 4 a mangisursuro iti pananghostage kadakuada ni Armando Ducat ken maysa a kaduana.

Comments are closed.