Footer

DV, Rambo, rematch para gobernador iti probinsia

VIGAN CITY – Kas ninamnama, napasamak ti panagbaliw iti kandidato ti oposision para gobernador iti probinsia iti masungad nga eleksion.

Sinuktan ni dati a bokal Efren “Rambo” Rafanan, Sr. ni Romeo Hidalgo babaen ti substitusion ket isu itan ti opisial a kandidato ti Partido ng Masang Pilipino para iti kinagobernador iti probinsia.

Ni Vice Governor Deogracias Victor “DV” Savellano, standard bearer ti Lakas-Christian Muslim Democrats, ti makasango ni Rafanan para gobernador iti masungad nga eleksion.

Ninamnama ti kampo ni Savellano daytoy nga addang ti kampo ni Rafanan agsipud ta inwayatdan ti substitusion iti eleksion idi 2001 a nagsanguan met laeng da Savellano ken ni Rafanan para iti kinagobernador iti probinsia.

Iti dayta nga eleksion, pinili ni Governor Luis “Chavit” Singson ti naginana iti politika kalpasan ti panangibulgarna iti mapapati a jueteng payola ken  tobacco excise tax kickback maikontra ken ni nagpresidente Joseph Estrada a nagtunged iti pannakapadisi daytoy iti puestona.

Imbalat ni Savellano ni Rafanan iti eleksion idi 2001 a nangitarayanna iti naud-udi iti nasurok a 23,000 a butos.

Idi eleksion iti 2004, nagsubli ni Singson a para gobernador ket ginaburanna ni Rafanan iti nasurok 43,000 a butos.

Iti panagkandidato ni Singson a para senador, ni Savellano ti pinilina a mangsublat iti kinagobernador ket katiketna ni Bokal Jerry Singson nga agtaray a para bise gobernador.

Kuna ti kampo ni Rafanan a dakkel ti tsansana iti daytoy a panagpipili ngem kuna met dagiti agpalpaliiw iti politika nga arigna agsang-at iti bantay gapu ta nabilbileg itan dagiti kasupadina iti politika idinto a kimmapsut ti grupoda kalpasan a nawarawara ti oposision iti probinsia.

Mapapati a nagsinan ti dalan da Rafanan ken ni Atty. Estelita Cordero, presidente ti Save Ilocos Sur Alliance, uray idi kangitingit ti kampania idi 2004.

Agkandidato ni Cordero a para bise gobernador kontra ken ni Bokal Jerry Singson ngem iti babaen ti United Opposition. Partido ni Estrada ti PMP a pagtarayan ni Rafanan, maysa laeng kadagiti naruay a partido iti oposision.

Malaksid iti dayta, addan iti kampo ti gobernador dagiti dua a dadaulo a kadua ni Rafanan iti oposision idi 2004 a pakaibilangan ni Nestor Seguismundo ken ni Bokal Ronnie Rapanut.

Agpapaay itan ni Seguismundo nga assistant election registrar iti Makati. Idi impila ni Gov. Singson ti kandidaturana para senador, ni Seguismundo ti maysa kadagiti nangibatad iti suportana iti gobernador.

Agpailayon met ni Rapanut a para bokal iti umuna a distrito ngem iti babaen itan ti Lakas-CMD, partido ni Gov. Singson nga isu ti provincial chairman.

Iti sabali a bangir, agkandidato ni Bokal Ronald Singson, anak ni Chavit, a para congressman a mangibagi iti umuna a distrito iti Ilocos Sur.

Sublaten ni Ronald ti puesto manipud ken ni Dip. Salacnib Baterina ta maungpotnan ti maikatlo a terminona kas diputado iti first district.

Induron met ni Baterina ti anakna, ni Ismael, a para bokal iti umuna a distrito.

Sanguen ngarud ni Rafanan ti napuskol a pader nga impasdek dagiti Singson nga ad-adda a pinatibker iti panagmaymaysadan iti kasinsinna a langilangan met iti politika iti maikadua a distrito.

Comments are closed.