Footer

OFW, kinabil ti kalugaranna

NARVACAN, Ilocos Sur – Maysa nga overseas Filipino worker ti nagpulong iti polis gapu iti panangkabil ti kalugaranna kenkuana idiay barangay Sulvec ditoy.

Nainaganan ti biktima a ni May Gladys Quiton, 29, naasawaan, maysa nga OFW, ken residente iti nasao met laeng a barangay idinto a nabigbig ti suspek a ni Danny Caniero, 54, ken kalugaran ti biktima.

Segun iti inisial nga inbestigasion ti polis, nagturong ti suspek a mapapati a nakainom iti balay ti biktima ket binirokna ti asawa ti OFW.

Insungbat ti katugangan ti biktima nga awan ti asawa ni Quiton ngem ditoy metten a pinagsasawan ti suspek ti biktima sana dinanog ken pinungot.  

Insigida nga inreklamo ti biktima ti suspek iti kuerpo ti pulisia.

Kabayatanna, nadukot ti kuarta ti maysa a balikbayan kabayatan ti pannakimisana iti simbaan katoliko ti Santa Maria, Ilocos Sur.

Nagpulong iti  polis ni Rose Daproza, 62, balikbayan manipud idiay Hawaii, USA ken temporario nga agnanaed iti Suso, Santa Maria, Ilocos Sur a dinukot dagiti saan a nabigbig a mannipdut ti kuartana a sumurok kumurang a P30,000.

Segun iti biktima, nakakabil ti walletna iti shoulder bagna idi napanda nakimisa ken ni  Brigido Daproza ken ni Dr. Editha Tolentino. Naglaon ti wallet iti P10,000, $500, credit card, business card, IDs ken dadduma pay.

Insigida nga inpulong ti biktima ti panagdukot iti pulis tapno maaksionanda.

Comments are closed.