Footer

Ti kuarta ken ti arte

MABALIN met nga aramiden ti kuarta a medium iti arte. Mabalin a sensilio nga agserbi a kas mosaic a naiyurnos iti arsadanan ti agdan wenno iti ridaw iti balay.

Ti arte ket panguartaan. Pamastrekan ti kuarta.

Ti arte ken ti kuarta. Ti kuarta ken ti arte. Agtibnokda a dua.

Ngem kasanon no intension nga aramaten ti arte tapno laeng makakuarta iti dakkel? Wenno saan a naipangpangruna ti arte ket arte?

Mabalin kadi nga isakripisio ti arte para laeng iti bukod nga interes uray no mangited iti pakasakitan iti adu a tattao wenno mangipaay iti immoralidad no di man panangtulaw iti nasged a pammati?

Umad-adu nga umad-adu dagiti mangtulaw iti Christianism. Saan laeng nga iti uneg a mismo ti inaladanna no di pay dagiti adipen ti arte.

Addan sumagmano a  naipabuya a pelikula a nakatulawan iti Christianism.  Ipammarang dagiti producer dagitoy a bunga ti arte  ngem saan a kumbinsido ti rasonda.

Itay nabiit, sabali manen a pannakatulaw koma iti Christianism ti naaramid no di nalapdan ti pannakaiparangna iti publiko. Ngamin, saan laeng a panangtulaw daytoy no di ket nagakupan koma ti akin-utek iti aglaplapusanan a kuarta.

Nagaramid ni Cosimo Cavallero, maysa a nalatak nga eskultor kadagiti makmakan, iti tsokolate a nasukog iti imahe ni Jesucristo. Ngem labus nga Jesucristo ti inaramid ni Cosimo. Daytoy koma ti ipabuyada itay semana iti maysa a nalatak a hotel sadiay New York.

Naimbag la ketdin ta nalapdan.

Ngem apay a labus? Apay a nairana iti semana? Saan kadi a mabalin a saan a labus? Saan kadi a mabalin a saan nga iti  semana ti pannakaiparangna?

Dagitoy dagiti dadakkel a saludsod.

No natuloy ti pannakaiparangna, dakkel la ketdi ti mapastrekda a kuarta itoy nga exhibit.

Itoy a punto, makitatayo ti pannakaaramat ti arte a kas pagakupan iti kuarta. Makita ditoy nga ad-adda a limtaw dayta pannakaaramat ti arte a panguartaan a saan ket a ti balor ti arte nga isu ti panguartaan. Adda balor ti tunggal aramid nga arte.  

Ditoy saan laeng a ti pannakaiparang iti nalaad a buya no di pay panangtulaw iti maysa a relihion babaen ti arte. Sakrilihio a panggep para laeng iti bukod nga interes, saan ket a ti arte a kas bunga ti arte.

Kas napudno a Kristiano, ditay bumdeng a mangkondenar kadagiti mangtulaw iti pammatitayo.