Footer

District engineer ti DPWH, napaltogan iti opisinana

CANDON CITY – Pinaltogan ti dua a lalaki a mapapati a gun for hire ti maysa a district engineer ti Department of Public Works and Highways ket kritikal ti kasasaadna iti nakaitarayanna nga ospital.

Pinaltogan dagiti dua a di pay nabigbig a lalaki iti agarup 12:45 iti malem ni Engr. Percival Bitonio, agdama a district engineer iti Second Ilocos Sur Engineering District iti uneg mismo ti opisinana ditoy siudad ket kuna dagiti doktor iti Candon City Hospital a nakaitarayanna a kritikal ti kondisionna gapu iti grabe a sugatna.

Kalpasan ti pammaltog,  kinuna dagiti saksi a rimmuar dagiti suspetsa iti pasdek sada nagna iti kalsada a kasla awan aniamanna.

Awan met ti nakitada a gateaway vehicle a nagluganan dagiti suspetsa.

Segun iti inisial a panagpalutpot dagiti polis ditoy, simrek ti bala iti akinkannigid a mata ni Bitonio ket simmalput iti babaen ti akinkannawan a paset ti lapayagna.

Nakarekobre dagiti nagresponde a polis iti maysa a kapsula manipud iti cal. 45 iti uneg ti comfort room.

Sumagmamano nga anggulo ti kitkitaen dagiti inbestigador a motibo iti pannakapaltog ni Bitonio, ket maysa ditoy no adda pannakainaigna iti politika.

Ni Bitonio ti asawa ni nagretiro a district supervisor iti Department of Education Amelia Bitonio ken mayoralty candidate iti San Juan, Ilocos Sur iti babaen ti independiente a partido.

Sabali pay nga anggulo a kitkitaen dagiti inbestigador no adda pakainaigan iti trabaho ti biktima iti pannakagandat ti biagna.

Segun iti inisial nga inbestigasion dagiti polis, nagsaludsod dagiti suspetsa a nagpabigbig  a taga-Cervantes, Ilocos Sur iti drayber ti biktima ket kinuyog pay daytoy ida a nagturong iti opisina ni Bitonio.

Mapapati a nadlaw ti drayber a napateg ti gagara ti dua iti biktima gapuna a rimmuar iti opisina.

Apagpanawna, nangegna nga inlitek dagiti suspetsa ti lock ti ridaw ti opisina ket nagsuspetsa iti kaadda iti dakes a gagemda isu a nagpatulong iti watchman ket nagkuyogda nga agturong iti opisina ni Bitonio.

Asidegdan iti ridaw ti opisina idi nakangegda iti putok.

Segun iti watchman, nagpaknida agsipud ta awan ti armasda.

Nakunana nga adda shotgun iti opisina ngem dagiti laeng pudpudno a guardia ti makaiggem iti daytoy.

Idi makapanaw dagiti suspetsa, linuktanda ti ridaw ti opisina babaen ti duplikado a tulbek ket nakitada laengen ti biktima a nadigos iti bukodna a dara iti comfort room.

Naitaray ni Bitonio iti Candon City General Hospital sa naiyalis iti ospital iti Lorma Hospital iti San Fernando City ket naisayangkatan iti operasion iti sugatna.

Comments are closed.