Footer

Kagawad, bimmagsol iti kalugaranna

Maysa a kagawad ti barangay ti mapapati a nangbagsol iti kabarangayanna kabayatan ti kaaddada iti maysa a pasken idiay barangay Rivadavia, Narvacan, Ilocos Sur.

Ti biktima ket nabigbig iti naganna a Randy Cabuena, 21, baro, estudiante ken agnaed iti nasao a barangay. Nainaganan dagiti masuspetsa a da kagawad Robert Cabebe, 27, baro, ken maysa a managan Jojo Cabanilla.

Iti inisial a panagpalutpot ti polis, naammuan a nagsabet iti dalan ti biktima ken dagiti suspetsa kabayatan ti pasalip dagiti bakla iti plaza kas paset iti selebrasion ti piesta iti barangayda ket mapapati a binagsol dagiti naud-udi ti biktima.

Naitaray iti Reyes Clinic and Hospital ti biktima ngem gapu iti nakaro dagiti sugatna, naiyalis iti St. James Hospital, Vigan City.

Naglibas dagiti masuspetsa kalpasan iti pammagkong a mapapati nga inkuyogda ti  patadem a naaramat iti krimen.

Kinuna dagiti pannakabagi ti linteg a dati a susik ti puon ti krimen ket awan pakainaiganna iti pulitika. (Danny Antalan)

Comments are closed.