Footer

Karit kadagiti baro nga opisial ti GUMIL-Filipinas

ITAY Abril 13-15 daytoy a tawen, rinangtayan manen ti maika-39 a konbension dagiti mannurat nga Ilokano ti iliw ken ilada ken pinabilegda ti panagkakabsatda iti sanguanan dagiti di panagkikinnaawatan ken giwang ti panagaaddayoda iti unos ti makatawen.

Iti daytoy met a tawen ti pannakaangay ti eleksion dagiti kabarbaro nga opisial ti gunglo dagiti mannurat nga Ilokano tapno masarakuyan ti pundasion ti gunglo gapu kadagiti kontrobersia a dandani namagsisina kadagiti dadaulona ken kamkameng.   

Nasurok a dua gasut a Gumilianos ken Gumilianas manipud kadagiti nadumaduma a Gumil chapters iti pagilian ken iti ballasiw-taaw ti nagdudupudop iti Currimao, Ilocos Norte para iti nailian a konbension ti Gumil-Filipinas.

Ngem mapaliiw ketdi nga adu a mannurat ti saan a timmabuno iti nasao a konbension kalpasan ti kontrobersia a naiparuar mainaig iti kuarta ken iti di maitultuloy a balay ti Gumil iti Sta. Maria, Ilocos Sur.

Saan a mailibak a sumagmamano a mannurat ti nangaramat laeng iti gunglo, saan a para iti pagsayaatan dagiti kabaddungalanda iti panagsurat, nangnangruna dagiti agdadamo a kasapulanda iti pannarabay iti panangikur-itda iti bukodda nga urit iti tay-ak ti literatura, no di para laeng iti bukodda a pagimbagan ken interes.

Mabalin a paglibakan dagiti dadaulo ti gunglo ngem adda dagitay nagpapili nga opisial a ninamnama dagiti kabaddungalanda nga adda iti puso ken interesda ti panagdur-as iti literatura Iloko ngem kalpasan ti panagpipili, saanda nga impaayan iti tiempo ken imatang dagiti miting ken pasken ti gunglo  idinto a kasapulan a presenteda kas pannakabagi dagiti mannurat.

Alegasion met dagiti kimmayakay iti gunglo nga adda dagiti dadduma nga opisial nga ar-aramatenda ti nagan ti gunglo tapno laeng maitag-ayda ti bukodda a trabaho  ken nagan ken tapno makaasidegda kadagiti politiko a pagdawatanda kadagiti pabor.

Dagitoy ti nangted iti dakes nga imahe iti gunglo a nakairamramanan dagiti nasayaat ti arapaap ken panggepda iti gunglo.

Kas iti pangngarig ti maysa a nabungsot a kamatis a nangdadael iti kinasadiwa dagiti nakailaokanna a kamatis, ti aramid ti sumagmamano, ti gunglo ti nagsagrap.

Ita, iti pannakapili dagiti kabarbaro nga opisial, kabuyogna ti namnama dagiti mannurat a saan a maipada dagitoy kadagiti sinublatanda nga opisial ket ti pagsayaatan ti gunglo ken dagiti mannurat ti prioridadda nga ipaayan iti imatang.

Adu ti problema dagiti mannurat, kas iti pannakaipablaak dagiti gapuananda, ti pannakailibro dagiti sinuratda, ti pannakaited iti dakdakkel a bayad kadagiti nagrigrigatanda a pinutar a sarita, daniw ken salaysay, ken iti ad-adu pay a workshop-seminar a pakapatademan ti plumada tapno agballigida iti tay-ak ti panagsuratan.

Dagitoy ti karit a sanguen dagiti kabarbaro nga opisial.

Barbareng adda magudilanda iti dua a tawen.

Comments are closed.