CABUGAO, Ilocos Sur – Maysa a konsilman ti napapatay ditoy itay nabiit babaen dagiti armado a tattao a mapapati a kameng ti New Peoples’ Army.
Inreport iti polis ni Roderick Padsol, 23, mannalon, agnaed iti sitio Caset, Barangay Maradudon ditoy nga ili, a lima a lima nga armado a tattao a mapapati a kameng ti komunista a gerilia ti nangpapatay ken ni Richard Padsol, konsilman iti isu met laeng a barangay.
Segun iti report, sakbay ti pammapatay, limtuad dagiti armado a tattao iti nasao a lugar ket imbilinda ken ni Maribel Padsol nga iddepenna ti silawda.
Kalpasanna nagturong dagitoy iti pagtaengan ti konsilman ket inawaganda ti biktima.
Mapapati a pinagsaludsodan dagiti suspetsa ti barangay kagawad no adda bimmisita kenkuana a kameng ti Philippine Army. Insungbat ti biktima a nakapatpatangna dagiti soldado idi Biernes Santo.
Segun iti maysa a saksi a dina kayat ti painaganan, pimmanawen dagiti armado a tattao. Ngem sumagmamano a darikmat kalpasanna, nakangngegda ti nagsasaruno a putok ti paltog.
Natay a sigida ti biktima manipud iti sugatna iti barukong, abaga, kanawan nga imma ken luppona.
Nakarekobre dagiti nagresponde a polis iti 4 a nagawangan a kapsula a nagtaud iti cal. 5.56 iti nakapasamakan ti krimen.
Madama ti panagimbestiga dagiti polis no sino dagiti nangisayangkat iti krimen.
Comments are closed.