Footer

Pannakarubbuot kampo ti NPA, dakkel a disnog kadakuada – militar

ABRA – Kinuna dagiti opisial ti militar ditoy a dakkel a disnog kadagiti rebelde a gerilia ti pannakarubbuot ti dakkel a kampoda iti Barangay Pacoc-Talampac, Lacub.

Segun ken ni Col. Loreto Rirao, agdama a commanding officer ti 503rd Infantry Brigade ti Philippine Army, nagballigi ti army ken military a nakastrek iti nasao a kampo kalpasan ti panagrinnupak ti dua a grupo agingga iti kaaldawan ti CPP-NPA idi Marso 29.  Natay iti dayta a rupak ni PO1Teddy Cumahleng ti RMG-PRO-COR.

Nakakumpiska iti nasao a kampo dagiti nagtipon a grupo dagiti pannakabagi ti linteg iti maysa nga M16 rifle, garand rifle, 6 anti-personnel mines, 4 TNT explosives, 2 hand grenades, 6 nga icom handheld radios, 2 NPA flags,  multi-media DLP projector, 3 generators, solar panel, chainsaw, telebision, dream cable satellite, DVD player, 3 wet cell batteries, 2 computer printers, flash discs ken CD’s, 200 meter hose,  libro manipud Marxist ken Lenin, medical paraphernalia, personal belongings, coffee grinder, mining tools, Bayan Muna ken Anakpawis campaign materials, ken subersibo a dokumento.

Segun ken ni Rirao, nadiskubre ti kampo idi Marso 12 babaen ti pannakaalada iti impormasion nga adda maisaysayangkat nga illegal a panagminas iti nasao a lugar nga aglawa iti 25 kuadrado kilometro.

Segun pay iti impormasion, daytoy ti main camp ni Juvencio Balweg iti Abra Provincial party committee ti CPP-NPA.

Innayon ni Col. Raul Bautista, commanding officer ti 41st  Infantry Battallion iti 5th Infantry Division a nakabase idiay Tagodtod, Lagangilang, Abra nga adda 24 a kubo iti uneg iti kampo a binukel  ti medical room, radio computer room, power house, supply room, alternate supply area, conference room, school house, kitchen/bakery.  Adda pay ti kulongan ti manok, pagnatengan, fishpond, pagdigusan ken basketball court.

Pattapatta ti militar a  tallon a tawen a naipasdek ti  kampo iti nasao a lugar.