Footer

Taga-Candon City a mannurat, inubonda dagiti pammadayaw iti salip iti panagsurat

CURRIMAO, Ilocos Norte – Inubon dagiti taga-Candon dagiti nadumaduma a pammadayaw iti kalkalpas a konbension nasional ti Gunglo dagiti Mannurat nga Ilokano iti Filipinas (Gumil-Filipinas) a naangay itay Abril 13-15 iti Ernesto Go Mega Complex, ditoy nga ili.

Inyawid da Jaime Raras, propesor iti University of Northern Philippines, Candon City, ken ni Danilo Antalan, reporter iti DZTP, Candon City, ti umuna a gunggona iti salip iti sarita iti Reynald F. Antonio Awards for Iluko Literature ken iti Sta. Rafaella Awards for Iluko Literature.  

Inyalat ni Reynaldo Duque, premiado a mannurat ken nagretiro a managing editor ti Liwayway Publications, Inc., ti maikadua a gunggona iti salip iti sarita para kadagiti senior citizens nga inesponsoran ni Judge Joven Costales idinto a maikalima a gunggona ti inabakna iti RFAAFIl.

Kabayatanna, naammuan a natibo iti Barangay San Jose, Candon City ngem agnanaed itan iti Baguio City a pangisursuruanna ni Clarita Aguirre Sumahit, nakagun-od iti umuna a gunggona iti salip iti sarita para iti senior citizen.

Nangabak ni Clarissa Gray, estudiante iti UNP-Candon Branch ken residente iti Tablac, Candon City iti maikatlo a gunggona iti salip iti salaysay, “Idolok ni Sir ken Ma’am”.

Iti on-the-spot writing contest para kadagiti agdadamo a naangay bayat ti konbension, inyalat ni Constante Balanza ti umuna a gunggona, ken maikatlo a gunggona ni Clarissa Gray.  

Iti benneg dagiti bangolan, inyalat ni Virgilio Naungayan, mangisursuro iti Darapidap Elementary School, Candon City ti maikatlo a gunggona, idinto a maikapat ni Jaime Raras.

Timmabuno iti 39th Gumil Convention dagiti tekken iti Literatura-Ilocana a pakairamanan da Juan S.P. Hidalgo, Jr., Jose Bragado ken pakairamanan dagiti mannurat manipud iti ballasiw-taaw kas kada Arnold Baxa, Pacita Saludes iti Hawaii, ken ni Rolando Racadio iti Italy.

Ni Hues Artemio Baxa, kaunaan a hues a Filipino idiay Hawaii, ti kangrunaan a bisita iti nasao a pasken. (Danny Antalan)