Footer

Ti inabalbalay (Umuna a paset)

BILIBAK kenka,” kinuna ni Armand iti naminsan. “Marigatanak a mangartap kenka.”

“Ikagkagumaam ti mangartap kaniak?” nababa ti timek ni Esther.

“Saan met. Ti bagik ti kayatko nga artapan.”

“Napintas a programa dayta. Tuladek.”

“Maragsakan ti BFmo iti reggetmo.”

Mangrugin ti atapko, napanunot ni Esther.

“Dinak sinungbatan, a?” nagsao manen ni Armand.

“A-awan ti boyfriendko.”

“Awan wenno awanen?”

“Awan ken awanen, parehoda.”

“Maawatak; ken magustuak ti kinaprangkom.”

“Kagurak ti ulbod.”

“Apay a kayatmo ti agabogado?”

“Ibagbagam nga ulbod amin nga abogado?”

“Kasano a mangabak ti abogado no di agulbod?” nagkatawa ni Armand.

Napaumel ni Esther:

“Maammuantayto dayta inton abogadotayon.”

Impakita ni Armand ti anus ken anepna iti balasang. Kalpasan ti klase, kuyogenna ni Esther nga ipalugan iti jeep nga agpa-Quezon City sakbay nga agpa-Baclaran. Ken ni Esther, rumrumsua iti pusona ti dina maawatan a rikna iti baro. No dadduma, kasla teenager a marimon iti baro idinto nga aggagar met a makiabay ken ni Armand iti klaseda. Rinugianna nga inamiris ti bagina. Rinepasona ti naliday a nalikudanna. Nagtibbayo ti barukongna.

Saan, saanen a maulit iti biagko. Kinemkem ni Esther ti sangina.

Kadagiti babassit a banag a napateg iti balasang, naganetget ni Armand nga agisagut ken ni Esther. Candy, chocolate, hairband, lapis, ballpen – adda latta iyawat ni Armand kenkuana.

“Amangan no mabangkrap ti kompaniayo,” isuklinto met ni Esther a bumbumtak ti isemna.

“Mangrabiita kalpasan ti klase,” inyawis ni Armand.

Ganggannaet kadi ni Esther kadagita? Dagiti naadalna iti padasna ken kadagiti libro ti romansa, ti lalaki a paayen rumugrugso nga agarem. No sumobra ti panagmadi, amangan no ibaw-ingna ti rugsona iti sabali. Templaen ti panagwen wenno panagsaan – ti panaginnarem agturong iti natalingenngen.

“Nabannogak, Armand, masapulko ti inana.”

“Inton maminsan ngarud, wen?”

Nagtung-ed ni Esther. Tung-ed, saan a balikas a wen ti kaannadan a sungbat. Ipakitana ti iyaanamong nga awanan dursok ken makaawis iti panagraem. Ti balikas a saan, no di maannadan, butbutngenna ti agkiddaw a kasla naungtan. Ti nalailo a wingiwing kayawanna ti agkiddaw nga agkiddawto manen.

Ngem kadagiti sumarsaruno a rabii, alas nuebe no malpas ti klase, ti guduat oras nga agpa-Quezon City, alas dieston a makasangpet ni Esther iti taengna. Ituonmo ti inaldaw a bannogna, nupay kayatna a patgan ti awis ti baro, agtukiad ti pigsana ket naawatan ni Armand dagita.

“Addanto sabali a rabii, Armand,” mangaw-awis ti ayug ni Esther.

Pudno. Iti sumuno a rabii, nag-strike dagiti propesor ti pagadalan. Awan ti klase dagiti agad-adal.

“Strike koma a kanayon,” inrabak ni Armand idi nakaorderdan iti pangrabiida iti maysa a restawran iti Quiapo.

“Saan met, a. Datayo ti maabakan.”

Nagabay dagiti dua iti lamisaan. Napno ti restawran iti tao. Medio makariribuk ti laaw ti music box, nabileg ti timek dagiti mangmangan.

“Adda kayatko nga ited kenka,” kinuna ni Armand.

“Awatek, saan la ketdi a singsing.” Nagbabawi ni Esther iti rabakna, dandani naltotan iti ellekna.

“Ngem singsing daytoy,” linukatan ni Armand ti bassit a kahon sana impatay iti lamisaan.

Kellaat a limmabaga ti pingping ti balasang. Naikuleng. Agkutkuti ti bibigna ngem awan ti balikas a nayesngawna.

Nagturay ti makatitileng nga ulimek kadagiti dua. Naisardeng ni Esther ti nangan. Kasla nabengbengan iti telon ti matana.

“Please, Esther,” nagpakpakaasi ti baro. “Isuotmo.”

Nagkidem ni Esther. Timrem ti ling-etna.

Natay ti silaw. Brownout!

Linakub ti sipnget ti restawran. Immarimbangaw dagiti tao. Iti apagdarikmat, narikna ni Esther ti pannakaiyusok ti singsing iti ramayna. Ginandatna nga uksoten.

“Please, Esther,” kinuna manen ni Armand. “Please.”

Nakapimpiman ti timek ti baro. Nagkidem manen ni Esther. Linukotna ti kanigid a dakulapna. Nainayad nga inyapputna ti kanawan a dakulapna, impangatona ida agingga iti naidekket iti bibigna. Rumimrimat dagiti matana.

“Thank you, Esther.” Ginammatan ni Armand ti takiag ti balasang ket iti dandani di mangngeg a balikas, intuloyna, “I’ll love you all the days of my life.”

Inutob ni Esther ti nangngegna. Linintegna ti bagina a nagtugaw. Pinerrengna ni Armand. Iti di mapagbiddutan a timek, kinunana:

“Malagipmo ti sungbatko iti saludsodmo maipapan iti boyfriendko?”

“Kinunam nga ‘awan ken awanen’.”

“Maannugotmo ti sibubukel a kaipapanan dayta?”

“Wen, idi pay…”

Ulimek.

“Maannugotmo a kalintegak a di ilawlawag ti kaipapananna?”

Nagtung-ed ni Armand: “Saanmo a gamden.”

“Iti unos ti biagta?”

“Inggana’t inggana.”

Pormal, nalamiis a panagkinnaawatan. Mayataday unay ti kasta iti programa ni Esther a naadaw iti bagina. Iti panangaklonna iti ayat ni Armand, nalitnaw iti mugingna dagiti sumarsaruno a peggad a rumbeng a parmekenna. Ket no isu ti rumukma a kas idi, iti derrep ni Armand ken iti bukodna, iti dalanna nga agbiag iti ayat ken ragsak, naitanemen ita a kanito.

Saan. Ni Armand ti maudi a lalaki a pakailaw-ananna. Ni Armand ti mangikallaysa kenkuana. Iti amin nga ayatna, iti amin nga angesna agingga iti maudi a pitik ti pusona, nangnangruna ti kararuana, ni Armand laeng ti agikut kadagita.

“Itulodka idiay balayyo,” kinuna ni Armand idi malpasdan a nangan.

“Saan pay nga ita,” insungbatna.

“Apay?”

“Bay-annak a mangutob a maymaysa iti lugan ti napagteng iti biagko ita a rabii.”

(Maigibusto)

Comments are closed.