Footer

Ti nasam-it a paria

MAYSA a pesimistiko ti nagkuna a nagan laengen ti paria ket saanen nga a interesado. Mabalin latta kenkuana uray awan ti paria itoy a lubong. Saanna a kayat a sidaen ti bunga man wenno  bulong, lalo dagiti atap a paria.

“Yuk, napait la ngaruden ti biagko, agsidaak pay laeng iti paria? Di pay ket nakapapaiten ti biagko?” kunana man.

Ala, dayta ti paniriganna iti biag. Bukodna a panirigan dayta. Nawaya ti asinoman  nga agsadag ken agurok iti bukodna nga indayon.

Nagduduma dagiti panirigan iti biag. Kannigid ken kannawan. Positibo ken negatibo.

Kabaliktad ni pesimistiko  ni optimistiko. Dina ibaga ti paria a napait no di ket nasam-it. No agpanunot, kankanayon a positibo a banag. Makuna a makaenganyo wenno makamagneto ti kapanunotanna. Makaiyanud iti rikna.

Iti naminsan a  panaglakok iti pagtagilakuanmi kadagiti prutas ken natnateng, kastoy ti kinuna ti maysa a sukimi:

“Ammom, diay ginatangko kenka nga utong, paria ken saluyot, dinengdengko, ayna, nagsam-it!”

Immisemak laeng ken ngimmato dagiti kidayko. Maysa nga optimistiko, nakunak iti bagik. Ta  nagbalinen a nasam-it diay paria.

Manmano a mangngegmo wenno  dimo pay ket ngata nangngeg iti unos ti panagbiagmo a nasam-it ti paria. Paria pay no nasam-it? Isu ngarud nga adu ti di mangayat iti paria nangruna kadagiti ubbing ta napait.

Positibo ti level ti panagpampanunot dagitoy nga optimistiko.

Maysa ti evaluation iti panagpampanunot ti maysa tao  kadagiti lesson iti mystical school. No optimistic wenno pessimistic daytoy.

Mangipresentarda iti danum a naikabil iti baso. Kagudua laeng ti linaon ti baso a danum, ket saludsodenda no ania ti makita ken maobserbarmo kadayta a naipresentar.

Itoy a gundaway,  matakuatan ti kinaasino ken ti agpang ti panunot ti maysa nga indibidual, no pessimistic wenno optimistic daytoy.

No “dandani mapunno!” kunana, maysa la ketdi nga optimistic daytoy a tao. Positibo ti linaon ti panunotna ket sisasagana ngarud nga umawat kadagiti narisgo a lesson wenno panagadal kadagiti mistiko a bambanag iti sirok ti init. Itoy a pannakatakuat iti level ti kapanunotanna, naliklikanna ti at-atiddog a panagadal. Ta ti panagadal kadagiti mystical ken phenomenal a bambanag ket agnanayon a nakabatay ti panunot iti level nga optimistic. Narigat nga akseptaren wenno iseksek iti muging dagiti mystical ken phenomenal a banag babaen iti panagpanunot iti negatibo.

“Dandanin maibus!” kastoy met ti panagkita dagiti pessimistic.  Aglanglangoy ti utekda iti agos ti negatibo. Ngarud, saan pay daytoy a sisasagana nga umawat kadagiti banag a nasken a maammuanna. Nasken ngarud nga isagana pay nga umuna ti level ti panunotna agingga iti panagbalinna a positibo.

Makatulong kadi ti agnanayon a pangikabil ti panunot iti level a positibo? Dakkel ti maitulongna iti biag.

Ngem maysa met a wagas  a panangloko wenno panangallilaw iti bukod a bagi ti panagpanunot iti positibo a di buyogan iti aramid. Saan nga umanay dayta a posision ti panagpampanunot no di met buyogan iti aramid.

(Adda tuloyna)