Footer

Valdez, nabutosan a prexy ti Gumil-Filipinas

CURRIMAO, Ilocos Norte – Ni Baldovino Valdez ti nabutosan a mangidaulo iti nailian a gunglo dagiti mannurat nga Ilokano iti eleksion a naangay iti Ernesto Go Mega Complex bayat ti konbension ditoy itay Abril 15.

Nabutosan a presidente ni Valdez, tubo ti Alicia Aurora, Isabela  ken agdama a provincial director ti Department of Interior and Local Government iti nasao a probinsia ket sinuktanna ni Dionisio S. Bulong, retirado nga editor ti Bannawag.

Kinasalip ni Valdez para presidente ni  Djuna Alcantara, presidente ti Gumil La Union.

Nabutosan met dagiti sumaganad: Elizabeth M. Raquel, bise-presidente; Rogie C. Baysa, sekretario; Ariel S. Tabag, tesorero; Ben Pacris, business manager; Prescillano Bermudez, auditor; ken Leo Fagaragan, PRO.  

Dagiti kameng ti Board of Directors: Manuel S. Diaz, Jobert Pacnis, Freddie Lazaro, Mario Tejada, Luvimin Aquino, Fe Camacho.

Kabayatanna, nasurok dua gasut a mannurat a naggapu iti nadumaduma a paset ti pagilian ken iti ballasiw-taaw ti timmabuno iti tallo-aldaw a konbension.

Iti rabii ti Abril 13, napadayawan dagiti  nangabak kadagiti nadumaduma a pasalip iti sarita ken daniw ken dagiti  indibidual ken organisasion a nakatulong iti panagrang-ay ti literatura Iloco.  

Naited ken ni Baldovino Valdez  ti Pedro Bucaneg Award idinto a naiyawat ken ni Cresencia Alcantara ti Leona Florentino Award.

Iti Abril 14,  naglektiur dagiti teddek ti literatura no kasano ti mangsangal iti sarita ken daniw. Iti malemna, pinasiar dagiti delegado ti agdindinnamag a rock formation nga agatiddog iti nasurok maysa a kilometro, makunkuna a kaatiddogan iti sangalubongan.

Ti tema ita a tawen: “Karit Ti Literatura ni Ilocano:  Napalabas, Agdama ken Masanguanan”.  

Natalna ken naurnos ti naisayangkat nga eleksion, saan a kas iti eleksion iti konbension a naangay iti Sta. Maria, Ilocos Sur nga adda timmaud a protesta mainaig iti panagbubutos.  

Agtakem iti unos ti dua a tawen dagiti kabarbaro nga opisial ti Gumil-Filipinas.