Footer

Dagiti sakasaka a sakada (Maudi a paset)

ANAT talabahom ita?” kinunana.

“Maid ya…!” naglibakak,  awan ti trabahok ti kayatko a sawen,

“Ta wada kansa WT? Kadduam ni John?”

“Agpadakamin nga awan…nabayagen…” ket immigupak manen iti kape.

Palpalabasanna ti inyawatko itay a resume. Diak nga inkabil a konektadoak iti Tawid News Magasin.

“Kasano ti kinaseriosom ken kinasenseridadmo iti anunsiom?”

Naggarakgak ketdi, sa pimmerreng.

“Nagadu ti Sakada. Sakasaka a Sakada. Dagitoy koma ti lumbeng a maikkat ta dida ket mangibabain kadatayo a media!”

Dagiti Sakada a kunkunana nga adda sinuratna  nga artikulo: damag, salaysay wenno uray laeng ladawan, ket mapanda isakada kadagiti inyaramidanda iti artikulo. No nagsakadada, agdawatda iti kuarta, kasta ti kayatna a sawen. Isu a naawaganda iti Sakada. Kunwari, sukat ti gasolina wenno pangmerienda wenno pangkaan wenno pangsiat.

“Apay a sakasaka a Sakada, kunam?” ngimmato pay dagiti kidayko.

“Nakabutbutengda. Kasda la idi panawen ti sakasaka idiay Ilocos Sul….!” nagellek.

Nakudkodko la ket ngarud ti di met nagatel a tuktokko. Nakasarak dataon!

Segun ken ni Pari Fred, arungaing ti hepe ti CIDG: “Adda pay daydiay inaldaw metten nga  umay dumawat iti panggasolina ti luganna! Pangal-alaak pay iti itedko? Nagbassit ti sueldok?”

Agsasallupang met dagiti media group ken organization. Nabileg ti maysa a Sakada no adda wenno ad-adu pay ti nakaikamenganna. Adda usarenna a nagan.

“Ultimo bertdey ti aso ken pusana, ket agaramid iti solicitation paper! No dimo met ikkan, nagadu a balbalasubasenna nga isursurat!” sennaay ti maysa a politiko. “Kas la kalaingan a defender kano iti righteousness ngem isu met ti kangrunaan a corrupt!”

Pudno ti kuna toy publisher. Maabuso no kua dayta solicitation.

“Isu nga awan ti agbayagbayag a repoltelko ta apaman a maammuak a maysa met a Sakada, wenno plotektol, ikkatek a dagus. Mangibabain, e!” kuna toy publisher. “Isu nga  inkabilkabilko a kastana iti anunsio.”

No apay ketdi met nga adu dagiti Sakada a media. Idi damo, isuda ti maawagan iti media-media people wenno half-media member ta ad-adda a para iti bukodda nga interes ti panggepda ngem iti agserbi iti  umili.

“Lalo ita panawen ti eleksion, ekspektalem, padle, dagiti kontlibiutors a mang-build up ken ni politiko.”

“Praise release…” inyellekko met.”

“Kusto met ti sueldoda. Apay nga agalamidda pay laeng iti madi? Tulongannak ngalud, padle! Sika man ti ageditol iti Ilocano Section. Nalalaingka met laeng nga adayo ngem siak…”

Immisemak. Ti field reporter nga inaplayak, editorship ti inyupreserna. Ngem iti panunotko, rumbeng laeng ti inaramid daytoy a publisher. Nasken a dalusanna  nga umuna ti laongna kadagiti Sakada tapno maikkat dagiti riper a kameng ti media.

No maminsan, kayattayo ti agdalus iti laongtayo ngem saantayo met nga ammo a sagadan, ruotan, urnosen, kasano koma ngarud ti intay panagdalus?

No maminsan, masemsemtayo kadagiti makamantsa a banag, ngem saantayo met nga ammo nga ikkaten dagitoy. Saantayo met a gamden a lappedan iti inda panagali.

Tapno madalusan ti laong ti media, nasken ngarud ti panagdalus dagiti publisher kadagiti laongda.

Saan koma nga ilako ni mediaman ti naganna, ti nagan ti pagiwarnak wenno magasin a pagsursuratanna.

Nawaya ti asinoman a mangsurat iti kayatna a suraten ta kasta la ngarud iti kawaya ti media. A kas daytoy a sinurat. ##