Footer

Di pannakaibutos ni Defensor iti Ilokandia, imballaag ni Chavit

VIGAN CITY – Saan a nasayaat ti panagsaad kadagiti sumagmamano a kandidato ti Team Unity a pakaibilangan ni Gov. Luis “Chavit” Singson ti imbalikas ni senatorial candidate Michael Defensor a maikkat ti kakapsutan a kandidato ti nasao a partido tapno maakomodar ni Independent Candidate Gregorio “Gringo” Honasan.

“Daytoy ngamin Defensor, ubing pay ngem madaldal unay,” reaksion ni Gov. Luis “Chavit” Singson ken maysa kadagiti senatorial candidates a mapapati nga innaganan ni Defensor.

Kinuna ni Singson a “madi ti ugalina daytoy (Defensor) ta dakamatenna amin a kakaduana a dadaelen tapno agpangato laeng,” idinto nga innayonna a “dakami amin a kandidato ket kagurami ti inaramidna.”

Iti maysa nga interbiona, kinuna ni Defensor a pabor a mairaman ni Honasan iti tiket ti Team Unity ket maikkat ti nakapsut a kandidato ti partido.

Ngem kinuna ni Presidential Political Adviser Gabriel Claudio a saan a pudno ti damag nga itinnag ti Team Unity ti kakapsutan a kandidatona tapno mairaman ni Honasan iti tiket.

Iti sabali a bangir, imbatad ni Honasan a nupay “pakaidayawanna”, agtuloy nga agkandidato para senador kas independente.

“Impilak ti kandidaturak kas independiente, intensionko nga ungpoten ti finish line kas independiente,” kinuna ni Honasan iti interbiona iti media.

Iti surbey a mangsaklaw iti Abril 14-17 nga imparuar ti Social Weather Stations, agpada da nagsenador Tessie Aquino-Oreta ken Singson nga adda iti maika-23-25 a puesto, maika-20 ni Gov. Vicente Magsaysay ken maika-18-19 ni Diputado Prospero Pichay.

Adda ni Defensor ken ni Cesar Montano iti maika-16-17 a puesto.

 Nupay naibalud ni Honasan iti lima a bulan ket saan a nakapagkampania, adda iti ranggo a maika-15 ket addaan iti “statistical chance”  a mangabak, segun dagiti nagsurbey.

Kinuna ni Singson a timmawag ni Defensor ket pinaglibakanna ti imbalikasna ken nagpadispensar ngem “dakam amin a kandidato ket kagurami ti inaramidna” sana innayon nga “isu a saan a rumbeng a maibutos dayta a Defensor kadatayo nga Ilokano.”

Kinuna ni Singson nga “amin dagitoy nga ipadpadamagda ket puro salawasaw idinto nga indagadagna kadagiti umili a “diyo patpatien dagitoy, (ta) pagdadaelda laeng.”

Kinuna ni Singson a saan nga agsanud, “mangabaktayo a mangabak agsipud ta “nariknak ti pulso dagiti tattao, amin a pappapanak, napintas, including Metro Manila.”

Kinunana a di agtalek iti surbey idinto a dinakamatna nga iti eleksion idi 2004, maika-25 ti ranggo ni Jamby Madrigal  kadagiti surbey ngem idi mabilang dagiti butos, maikapat iti puesto daytoy.

“Nabayagakon a politiko, ti masapulmo no nationwide, organisasion ken makinaria,” sana innayon nga “iti daytoy a situasion, adda bentahetayo ta amin a gobernador ti mangipagpagna (kandidaturana) ken adda makinaria ken well-funded,” kinuna ni Singson.