Footer

Kakandidato iti I. Norte, nagpirmada iti peace covenant

LAOAG CITY – Kas paset ti gannuat a pannakaisayangkat ti nadalus ken natalna nga eleksion, nagpipinnirma dagiti kandidato para iti nadumaduma a puesto ditoy iti katulagan ti kappia.

Naiwayat ti panagpinnirma iti peace covenant kalpasan ti mass for peace a naangay iti St. Williams Cathedral ditoy tapno masigurado ti honest, orderly ken peaceful elections (HOPE) ditoy probinsia.

Ti panagpipinirma ket dinar-ayan dagiti kandidato manipud iti maysa a siudad ken 21 a munisipalidad, ken  personal nga inimatangan da Most Reverend Sergio L. Utleg, Bishop ti Diocese ti Laoag, ken ni PNP Regional Director Police Chief Supt. Leopoldo Bataoil, Provincial Director PSSupt. Roman S. Felix, Provincial Election officer Atty. Alipio Castillo III ken ti media.

Impeksa ni Bataoil ti panagyamanna kadagiti kandidato ken dagiti umili iti Ilocos Norte gapu iti panangitedda iti kooperasion para iti natalna ken nadalus nga eleksion.

“Mamatiak a magun-od toy probinsia ti honest, orderly and peaceful elections intono Mayo 14 agsipud ta dandani amin dagiti kandidato ket adda ditoy tapno makipagpirma iti peace covenants,” kinuna ni Bataoil.

Iti daytoy nga eleksion, agsango da Rudy Fariñas ken Michael Marcos Keon para iti kinagobernador ditoy.

Saan nga intuloy ni Dip. Imee Marcos ti panagkandidatona a para gobernador a binakantean ti kabsatna agsipud ta naturposnan ti maikatlo a terminona kas gobernador.

Agtaray ni Gob. Bongbong Marcos para diputado iti masungad a panagpipili.