Footer

Ni panunot, dimi maaramid: incumbent mayor

SAN JUAN, Ilocos Sur – “Ni panunot, saanko man a maaramid ti kasdiay.”

Daytoy ti reaksion ni Mayor ditoy Benjamin Sarmiento mainaig iti dinakamat ni mayoralty candidate Amelia Bitonio nga adda pakainaigan iti politika ti pannakapaltog ni lakayna.

Kinuna ni Sarmiento a maawatanna ti rikna ti kasalipna iti politika ket saanna a babalawen daytoy ngem nakunana a kapilitan a timmawag iti programa ni Jun Ramos “agsipud iti reaksion ni Amy (Bitonio) a politically motivated” ti pannakagandat ti biag ti lakayna.  

Iti pannakiinnuman ni Jun Ramos ken ni Bitonio iti ospital a nakaitarayan ti asawana, nadakamat daytoy nga awan ti kagurgurada wenno gumurgura kadakuada ket awan ti sabali nga ammona a motibo iti pannakagandat ti biag ti asawana no saan a politically motivated.

“Agkarkararagak a sapay koma nga iti kabiitan a panawen, makarekober ni Engineer tapno maibagana no asino a talaga ti akin-aramid iti daydiay (pannakapaltogna),” kinuna ni Sarmiento idinto nga inyunay-unayna a “nadalus ti konsensiak iti daytoy ket ni panunot, saanmi a maaramid daydiay.”

Napaltogan ni District Engineer ti Second Engineering District ti Department of Public Works and Highways, Candon City ni  Percival Bitonio, asawa ni mayoralty candidate ditoy nga ili Amelia Bitonio, iti mismo nga opisinana bayat ti lunch break.

Nakarekobre dagiti nagresponde a polis iti maysa a kapsula manipud iti cal. 45 iti uneg ti comfort room.

Pimmusay ni Bitonio iti ospital iti San Fernando City itay Sabado, Abril 21.

Segun iti drayber, dua a lalaki a nagpabigbig a taga-Cervantes ti nangsapul ken ni Bitonio ket kinuyogna dagitoy a napan iti opisina ti district engineer.

Agmaymaysa ti biktima iti opisinana ta lunch break.

Mainaig iti dinakamat ni Bitonio nga adda nangpa-withdraw kenkuana idi maudi nga aldaw ti panagipila iti kandidatura, inlawlawag ni Sarmiento nga adda daydi panagurnos iti ngato iti kakandidato ditoy  probinsia iti babaen ti Unity ticket sana innayon a saan nga isu ti nangpa-withdraw ken ni Bitonio.

Kinuna ni Sarmiento a sakbay nga agtaray, kondisionenna ti bagina nga “akuenna ti responsibilidadna no adda gasatna manen nga agserbi”  kasta met nga “akuenna met a no namnamaen dagiti kailianna a saanen a rumbeng nga agserbi, saandan nga ibutos.”

Dinawat ni Sarmiento a “daytoy kadi nga eleksion ket saan nga isu ti pakasinasinaantayo” idinto nga indagadagna a “no patien dagiti kakailiak a dakami wenno siak ti akin-aramid, saandak nga ibutosen, pangngaasida; ngem no saanda a patien, tulongandak met a mang-vindicate iti naganko babaen ti panangbutosda ken panangitedda met laeng iti talekda kaniak.”

“Saan a toy numo ti biang ti akinpanunot. Ni panunot, saanko man a napanunotan nga aramiden ti kasdiay,” kinuna ni Sarmiento idinto nga inayunay-unayna a “sapay koma ta rummuar ti kinapudno iti kabiitan a panawen.”