Footer

Pammaltog iti DPWH Engr. Office Politically motivated: Independent mayoralty candidate

SAN FERNANDO CITY – Kinuna ni San Juan mayoralty candidate Amelia Bitonio nga adda pakainaigan iti politika ti pannakagandat iti biag ti asawana.

“… Awan ti ammomi a kagurgurana wenno gumurgura kenkuana… nasayaat ti pannakilangenna… ket awan ti sabali nga ammok a motibo ti pannakaikastoyna no saan a politically-motivated,” kinuna ni Bitonio bayat ti pannakiuman kenkuana ni Jun Ramos a naipatangatang iti Barangay Commando Brigada sakbay a pimmusay ti asawana.

Pinaltogan ti dua a lalaki a mapapati a gun for hire ni Engr. Percival Bitonio, agdama a district engineer iti Second Ilocos Sur Engineering District ti Department of Public Works and Highways, Candon City iti agarup 12:45 iti malem iti uneg mismo ti opisinana.

Immuna a naitaray ni Bitonio iti Candon City General Hospital sa naiyalis iti Lorma Hospital ngem pimmusay gapu iti linak-amna a grabe a sugat.

Segun iti inisial a panagpalutpot dagiti polis ditoy, simrek ti bala iti akinkannigid a mata ni Bitonio ket simmalput iti babaen ti akinkannawan a paset ti lapayagna.

Segun iti watchman ken drayber ni Bitonio, kalpasan ti pammaltog,  rimmuar dagiti suspetsa iti compound ti pasdek sada nagna a kasla awan aniamanna iti kalsada.

Nupay kasta, nagkitakit ni Bitonio a mangibaga iti kinasiasino ti atapenna nga adda iti likudan ti pannakagandat iti biag ti asawana.

“Narigatko pay la nga ibaga diay pampanunotenmi a makaaramid iti kasta… ti laeng pay concernmi ti kondision ni (Manongmo) Perci,” kinuna ni Bitonio idi dinamag ni Ramos no adda agay-ayam iti pampanunotna iti posible a nakaigapu iti napasamak.

Kinuna ni Bitonio nga uray dagiti kaopisinaan ni lakayna, “pulos nga awan ti maibagada a kabusor wenno mangbusbusor kenkuana agsipud ta nasayaat  pannakilangenna kadakuada manipud kababaan nga empleado agingga dagiti hepe.

Innayon ni Bitonio nga awan ti seguridad ti asawana ta nakumpiansa nga awan ti mangdangran kenkuana, agsipud ta “awan met ti ammomi a basolmi iti kakaduami, iti kakailianmi,” idinto nga innayonna a “dayta laeng no pakabasolanmi daytoy inkam panagtaray iti daytoy umay nga eleksion.”

Dinakamat ni Bitonio nga idi maudi nga aldaw ti panagipila ti kandidatura, adda nangpa-withdraw kenkuana a sumango a mayor.

Nupay kasta, saan nga inlatak ni Bitonio no asino ti nangpawithdraw kenkuana.

Kinuna ni Bitonio nga iti baet ti napasamak, “naregregget pay ti riknak a mangituloy iti kandidaturak”, ket saan a ti pannakapaltog ti asawana ti pakaupayan ti panagkandidatona agsipud ta “amin a puso ken riknak adda iti kakailiak iti San Juan.

Comments are closed.