Footer

Pammapatay iti Cabugao, inako ti Alfredo Cesar Command, Ilocos

Kuna ti surat: nakedngan ti konsilman iti dusa a patay

INAKO ti maysa a unit ti rebelde a gerilia nga agdakdakiwas iti Ilocos nga isuda ti akinreponsable iti pannakapapatay itay nabiit iti maysa a konsilman iti sitio Caset, Barangay Maradudon, Cabugao, Ilocos Sur.

Iti surat a naipatulod iti DZTP, Candon City, kinuna ti Alfredo Cesar Command, maysa a unit ti New People’s Army iti Ilocos, a ti grupoda ti nangisayangkat iti pannakapapatay ni Richard Tatson, residente ti Sitio Caset, Maradodon, Cabugao, Ilocos Sur idi Abril 14 iti daytoy a tawen gapu iti mapapati a panagipatpatulodna iti impormasion iti militar.

“Ni Richard Tatson ket napaneknekan a nagbasol iti rebolusyonaryo ken iti umili gapu kadagiti pinasetna kas maysa a napeklan a kameng ti Barangay Intelligence Network (BIN) iti lugarda,” kinuna ti maysa a paset ti surat a pinirmaan ti maysa a Ka Miguel Cervantes, parasao ti Alfredo Cesar Command idinto nga inaklonda nga inyetnag ti rebulosionario a korte ti dusa a patay ken ni Tatson.

Lima nga armado a tattao a mapapati a kameng ti komunista a gerilia ti nangpaltog ken ni Tatson a puon ti dagus a nakatayanna.

Mapapati a pinagsaludsodan dagiti suspetsa ti barangay kagawad no adda bimmisita kenkuana a kameng ti Philippine Army.

Maipagarup nga insungbat ti biktima a nakapatpatangna dagiti soldado iti Biernes Santo.

Segun iti inbestigasion, pimmanaw dagiti armado a tattao ngem di mabayag, adda nangeg dagiti lumugar a nagsasaruno a putok.

Natay a sigida ni Tatson manipud iti sugatna iti barukong, abaga, kannawan nga ima ken luppona a nagtaud iti cal. 5.56 kas maibasar iti uppat a kapsula iti nakapasamakan ti krimen.

Kinuna pay ti surat a binallaagandan ni Tatson nga isardengnan ti agipasa iti impormasion iti Philippine Army ngem saan nga intaltalek daytoy.

Kinuna ti surat a naiyetnag ti dusa a patay ken ni Tatson gapu iti basolna iti tignay ken kadagiti umili.

Comments are closed.