Footer

Santacrusan, kadakkelan a parambak iti Mayo

NO DUMTENG ti Mayo, lumangto dagiti muyong gapu iti isasangbay ti tudo. Kadagiti talon ken lapog, aglunit dagiti rengngat, agtubo dagiti rettab a mangpaberde iti aglawlaw. Kadagiti masetas, lalo pay nga umadu ti sabongda, ket agdidinnaer ti bangloda a mangpabang-ar iti rikna.

Iti umuna nga aldaw ti Mayo, marambakan ti Labor Day wenno aldaw ti trabaho kas panangitag-ay kadagiti mangmangged a makunkuna a sadiri ti pagilian.

Itoy a bulan, adu dagiti maangay a festival ken piesta kas iti Carabao Festival iti Angono, Rizal ken Pulilan, Bulacan; Obando Fertility Rites iti Obando, Bulacan; dagiti piesta a panangilagip ken ni San Jose ken ni San Roque kadagiti nadumaduma nga ili ken barbarangay. Santo dagiti mangmangged wenno obrero ti immuna   idinto a santo dagiti mannalon ti maikadua.

Ditoy Siudad ti Vigan maselebraran  met  ti Vigan Festival of the Culture and the Arts tunggal Mayo 1-3.  Kadagitoy nga aldaw, mabuya kadagiti nadumaduma a barangay ti siudad dagiti  nangruna dagiti adda iti uneg ti poblasion ti lumba iti kalesin, baka wenno nuang, yuuli iti palo sebo, panangiyusok iti panait iti dagum kabayatan ti panagbisikleta wenno panagtaray ken dadduma pay nga aktibidad a mangitag-ay kadagiti kannawidan ken kultura ni Ilokano.

Nagbalin metten a destinasion dagiti turista ti Vigan City ti Binatbatan street dancing no sadino nga ipakita dagiti partisipante babaen ti sala no kasano nga agbalin nga  aruaten ti kapas.

Tampok a pabuya ti sarsuela Ilokano a kadawyan a maipabuya iti rabii ti  Mayo 3. Iti sardam, mailibut ti karro ni Birhen Santa Maria kadagiti naipatakder a rama a nakaiyarkosan dagiti apit kas iti saba, mangga, niog ken dadduma pay a produkto iti talon.

Sumagmamano met nga ili iti probinsia ti agpiesta iti bulan ti Mayo kas iti Bantay, Sto. Domingo, Sinait ken dadduma pay.

Ngem kalatakan amin a parambak iti daytoy a bulan ti Santacruzan wenno Flores de Mayo wenno Flores de Maria wenno May Flower Festival. Sabong ti kayat a sawen ti Flores. Daytoy a rambak ket panangilagip iti pannakasarak ni Reyna Helena wenno Elena iti Roma iti Sagrado a Krus sadiay Jerusalem. Ni Reyna Helena ti ina ni Constantine the Great.

Mairuknoy daytoy a rambak ken ni Santa Maria nga Ina ni Jesus.

Dagiti Kastila ti nangiyam-ammo kadaytoy a rambak iti pagilian. Nangrugi daytoy kalpasan ti pannakaiproklamar ti dogma wenno pammati iti Immaculada Concepcion idi 1854. Maangay ti nobena iti siam nga aldaw, ket kalpasanna, adda maaramid a prosesion dagiti agkakalibnos a babbalasang ken bayabayda a mangsimsimbolo kadagiti sumaganad a kas iti panagsasagannadda wenno urnosda iti prosesion:

1.Methuselah (Metusalem)—imingan a lalaki, agkubkubbon, nakasakay iti kariton ken agkirkirog iti darat babaen ti pariok a naipuesta iti dalikan nga addaan apuy. Isimbolo daytoy a parang  nga amin a nasileng ditoy rabaw ti daga ket agbalindanto laeng a kas kinirog a darat. Iti literal a panangilawlawag, amin a kinabaknang ditoy rabaw ti daga ket agsublidanto iti daga; ket amin a tao a nagtaud iti tapok agsublidanto met laeng iti tapok.

2. Reyna Banderada – nalibnos a balasang a nakabado iti atiddog a nalabaga a gown ket adda awitna nga amarillio a trianggulo a bandera. Irepresentarna ti isasangbay ti Kristianismo.

3. Dagiti Aeta wenno Negrito – isimboloda ti nasion sakbay ti yaay ti Kristianismo. Simbolo dagiti pagano.

4. Reyna Mora – irepresentarna Islam a  dominante a relihion idi un-unana ditoy pagilian.

(Adda tuloyna)

Comments are closed.