Footer

Ti nasam-it a paria (maudi a paset)

ALA MAN padasem ti agtugaw lattan iti suli ti balaymo ket agpanunotka nga agpanunot iti positibo a banag, kas koma iti adda sumangpet a kuarta wenno adda sumangpet a makanmo wenno trabaho ti mangbirok kenka.

No pumudno, nalabit a maysa iti maysa a million wenno ad-adu pay ngata. Nairanrana laeng ngata dayta. Ngem no nagpanunotka iti positibo a banag ket binuyogam pay iti aramid, sabalin daytoy. No kayatmo ti maaddaan iti kuarta, nasken nga agtrabahoka. No kayatmo ti trabaho, agsapulka ta manmano a mapasamak a dayta trabaho ti agbirok kenka.

Adtoy ti maysa pay nga estoria maipapan iti positibo a panagpampanunot.

Maysa a track and field enthusiast ni Dave. Pasaray agtaray iti oval. Iti naminsan nga aldaw, naranaanna a madama ti ay-ayam a baseball. Katengngaanen ti ay-ayam. Nagdamag ni Dave no ania ti mapaspasamak idi nabatoganna ti maysa a player iti field.

“Asino ti mangab-abak?”

“Dakami!” insungbat ti player.

“Mano ti iskoren?

“25-0”

Nagsardeng ni Dave. “Tambak met gayamen! Naglaingkayon no nakaiskorkayon iti 25 idinto ta zero pay laeng ti kasalisalyo?”

“Dakami ti zero!”

Nakudkod la ket ngarud ni Dave ti di met nagatel a tuktokna. Ket kunana ti bagina: “Nakasarak sa met dataon iti bagtit a player?” Ngem sinungbatanna met laeng ti bukodna a bagi: “Awan ti bagtit a player. Ti maysa player ket malakas ang loob, matibay ang dibdib ken addaan iti strong determination.”

Iniseman ken kiniddayan pay ti player. Siguro, nadlawna ngata a naikuleng ni Dave a mangkudkudkod iti di met nagatel a tuktokna.

“Kasano a kunam a mangab-abakkayo ket zero pay met ti iskoryo?”

Wen, kasano koma a maibaga a mangab-abakda ket ibbong pay laeng ti iskorda?

“Ket no dikam pay laeng nagbat!”

Ngimmato pay dagiti kiday ni Dave ket napanganga.

“Inton dakami ti sumaruno nga agbat, uray pupuotem, saanmi laeng nga abuten ida, ad-adu pay ti iskorenmi. Isu a mangabakkami. Kastan, adtoyen ti bola. Kamatek…”

Ket binuya ni Dave ti panangkamat ti fielder iti sumsumiag a bola. Impennek  daytoy ti nagtaray. Linagtona a sinippaw ti bola. Nagsultip ti reperi. Out!

No di nasippaw ti fielder ti bola, nalabit a homerun koma ti kalabanda. Immadu koma manen ti iskor.

Simmaruno met nga agmalo iti bola ti team ti nagsaludsodanna.

Insardeng ti Dave ti nagtaray ket pinaliiwna ti panagay-ayam dagiti agbebesbol. Napangilangil pay ni Dave idi nalpas ti ay-ayam. Nakaabot ken ad-adu nga amang iti lima ti iskor ti nagdamaganna itay.

“Nabara a kablaaw, gayyem!” inasitganna daytoy a linamano.

“Mamatikan iti kunak?”

“Wen…”

“Agingga nga umang-anges pay, adda namnama.”

“Hustoka. Dayawenka iti pinget ken reggetyo a mangabak. Dakkel ti nasursurok.”

Agingga nga umang-anges, adda pay laeng namnama. Anian a positibo a panagpampanunot.

Iti biag, no yaplikar met ti positibo a panagpampanunot, maliklikan ti nakana a liday, bisin ken pannakapaay. Ta dagiti makunkuna nga addaan iti strong will dagiti agballigi.

Strong will. Never say die. Daytoy a kananakem, ugali ken panagpampanunot ti namaglatak iti Team Ginebra iti PBA. Ta uray no maab-abakda wenno natambakanda, agay-ayamda pay laeng a sipipinget ken mangnamnama iti inda panangabak.

Dayta ti strong will. No yaplikar iti biag ti positibo a panagpampanunot, sigurado met ti panagballigi.