Footer

Aldaw dagiti ina, selebrasion iti sangalubongan

APAY nga adda Mother’s Day?

Wen, maikanatad laeng ti kinaadda ti maysa nga aldaw a naisangsangayan wenno nairanta a para laeng iti patpatgentayo nga ina.

Ti inatayo ti nakautangantayo iti biag.

Ti inatayo ti kaunaan a titsertayo.

Ti inatayo ti managayat nga ima a mangbatak kadatayo no maitublaktayo.

Ti inatayo ti salaknibtayo iti panawen ti peggad.

Ti inatayo ti ules iti nalam-ek a parbangon lalo idi maladaga ken ubbingtayo.

Ti kamangtayo no adda parikuttayo.

Ti agung-unget-nga-agkatkatawa a kibintayo iti kinaalikutegtayo nga ubing.

Ti kaunaan a mamagbaga no nagbiddutayo iti taltaluntonentayo iti dana ti biag.

Ti daga a nagtubuantay…ken adu pay a depinision…

Kasano a naaddaan iti selebrasion a Mother’s day?

Adu a nasion ti mangselselebrar iti Mother’s Day. Uray datayo a Pinoy, no dumteng ti kastoy nga aldaw, ikkantayo met iti panagyaman ti inatayo ken da lola ken angkettayo gapu iti panangtaripatoda kadatayo idi ubbingtayo.

Nangrugi daytoy a selebrasion idi pay laeng un-unana wenno kadagiti kaunaan nga spring festivals.

Iti Greek mythology, ni Rhea ti maaw-awagan iti maternal goddess. Asawa ni Cronus. Ni Rhea ti ina dagiti amin a diosen ken diosa.

Iti duog a mitolohia dagiti Romano, iruknoyda daytoy nga aldaw iti diosa dagiti ina wenno ina dagiti diosa ken diosen nga isu ni Cybele. Agpaut iti 3-4 nga aldaw a selebrasion a nakasentro iti panagsubalit ken pananglagip iti panangpadakkel-panangtaripato ti ina iti/kadagiti anakna.

Sadiay England, nangrugi ti panangselebrar iti Aldaw dagiti Ina idi 1600s. Awaganda daytoy iti Mothering Sunday, nga agtinnag wenno agpetsa iti maikapat a Domingo kalpasan ti Nangina nga Aldaw.

Sadiay met United States, ni Julia Ward Howe ti kaunaan a nangisingasing iti pannakaadda iti Mother’s Day idi 1872.

Ngem maysa a babai a saan a nagbalin nga ina, ni Anna Jarvis, ti nangidaulo iti pannakapaadda iti Mother’s Day iti US. Rinugianna ti seremonia kas panangidayawna iti inana idi 1907 sadiay Grafton, West Viginia. Kalpasanna, indauluanna ti kampania iti pannakapaadda ti Naisangsangayan nga Aldaw dagiti Inna.

Ti Estado ti Virginia ti kaunaan a naaddaan iti holiday.

Idi 1914, indeklara ni President Wilson a kada maikadua a Domingo ti Mayo ti panangselebrar itoy iti sibubukel a US.

Ti carnation ti sabong a napili kadaytoy a holiday wenno selebrasion. Napili ti carnation ta daytoy ti mangisimbolo iti maysa nga ina. Iti agdama, nabingayen dagiti dua a maris ti carnation: no puraw a sabong ti carnation, isimbolona ti natay nga ina, idinto a no nalabaga, sibibiag pay laeng nga ina.

Di nagbayag, nagbalin a komersialismo ti panangrambak iti Aldaw ti Ina. Isu nga idi 1923, nangipila iti lawsuit wenno darum ni Jarvis iti kaaldawan a mismo ti Mother’s day.

Iti agdama, uray no nagbalinen a komersial ti parambak, saantayo a malipatan a kablaawan ti inatayo iti naimbag nga aldaw wenno Mother’s Day. Wenno saan, lagipentayo dagiti naimbag nga aldaw iti kinaaddatayo iti sidong ti nakautangantayo iti biag.

Ita a tawen, selebraran ti adu a nasion iti lubong ti Aldaw ti Ina iti maikadua a Domingo daytoy a bulan, nga isu dayta ti Mayo 13, 2007.

Ken ni inang—mmuuuuahhhhh!

Kadagiti amin nga ina: Happy Mother’s Day!

Comments are closed.