Footer

Dagiti lilibeg a party-list organizations

KAS panagtungpalna iti pammilin ti Korte Suprema, imparuar ti Commission on Elections dagiti nominees dagiti nadumaduma a party-list groups iti sanguanan dagiti alegasion a dagiti tattao nga adda iti likudan dagiti sumagmamano a grupo ket saanda nga ibagian dagiti marginalized wenno marigrigat a sektor.

Sakbayna, nangipila ti nongoverment organization a Bantay Republic Act 7941 ken ti Urban Poor For Legal Reforms iti petision iti Korte Suprema a nangkiddawanda iti pannakadiskualipika ti 34 a party-list groups agsipud ta saan a pudpudno nga ibagian dagiti nominadoda a tattao dagiti maipapaigid wenno saan unay a maibagbagian a sektor iti sosiedad.

Nangidatag met ti Kilosbayan Foundation, Akbayan ken Bantay Katarungan Foundation iti petision a nangdawatanda iti Korte Suprema a mangbilin iti Commission on Elections iti panangruk-atna iti nagan dagiti nominado a tattao dagiti accredited a party-list groups.

Adu nga umili ti saan a makaammo a nairusat daytoy nga inobasion iti Pagalagadan ti pagilian idi 1987 wenno 20 a tawen itan ti napalabas babaen ti RA 7941, wenno Party-List System Law.

Naputar daytoy a linteg tapno maikkan iti gundaway ti grupo dagiti marginalized wenno marigrigat a sektor a pakaibilangan dagiti mangmangged, mangisursuro, traysikelan, kooperatiba, elektrisidad, ken dadduma pay a maibagian iti Pagpandayan-Linteg, malaksid laeng kadagiti diputado ken senador a butosan dagiti umili iti eleksion.

Kas sagudayen ti Seksion 5 ti Artikulo VI ti Konstitusion, maikkan iti representasion dagiti maipaspasuli ken awanan bileg a bassit laeng ti pagpisipisanda kadagiti tradisional ken elitiko a partido politikal.

Ngem iti daytoy nga eleksion a kapaliiwan a naituon ti imatang dagiti umili kadagiti nadumaduma a party-list groups nga agngayangay a pabutosan tapno ibagianda dagiti marigrigat wenno marginalized a sektor iti Kongreso, kasungani kadagiti napalabas nga eleksion nga awan unay ti interes a pinarnuay dagitoy a grupo kadagiti botante.

Nangrugi daytoy iti alegasion ti sumagmamano a militante a grupo a kas iti Akbayan ken Gabriela nga adda dagiti party-list groups a suportado ti Malakaniang.

Idi Abril 20, imparuar ti Migrante International, maysa a grupo a kritikal iti Arroyo administration, ti maysa a dokumento a napetsaan iti Oktubre 16, 2006 a mapapati a pinirmaan ni Assistant Secretary Marcelo Fariñas II, pangulo ti Office of External Affair-Special Operations Group.

Nadakamat ti nasao a memorandum ti pannakabuangay ti OEA- Special Operations Group a nakasentro iti partisipasion dagiti kaaliado ti turay a non-government organizations ken organisasion dagiti tattao iti congressional election iti 2007.

Iti daytoy a memorandum, mapapati a nagkiddaw ni Fariñas iti pundo manipud iti Presidential Intelligence Fund tapno mapunduan dagiti party-list organizations a pabor iti administrasion.

Uppat a party-list organizations ti nadakamat a pangrugian a tulongan ti OEA-SOG: ti Agbiag, Timpuyog Ilocano (Agbiag), Babae Para Sa Kaunlaran (Babae Ka), League of Youth for Peace and Development (Lypad) ken Kalahi Advocates for Overseas Filipinos (Kalahi).

Agdagup iti P5.5 milion ti mapapati a kiniddaw ni Fariñas a pundo tapno matun-oyan ti panggep ti OEA kas sinaguday ti memorandum.

Makaawat iti P150,000 dagiti lima a party-list organizations a suportaran ti OEA-SOG a busbosenda para kadagiti miting a panang-organisa ken panangkonsolidarda iti grupoda ken suporta iti operasionda. Adda pay kanayon a P550,000 para kadagiti “taripnongda”.

Madakamat ditoy a ni Fariñas ti sekretario-heneral ti Agbiag! Isu ti maysa kadagiti innem nga assistant secretaries iti OEA ket adda daytoy iti babaen ti opisina ni Presidential Political Adviser Gabriel Claudio.

Ngem pinaglibakan ni Fariñas nga isu ti nangaramid iti nasao a memorandum idinto a kinunana nga awan ti personalidadna a “mangaramid iti surat iti assistant ti Presidente a dumawdawat iti P5.5 milion agsipud ta saan nga isu ti hepe ti Office of External Affairs.

Inkalinteganna pay nga awan ni siping a naawat ti Agbiag manipud iti gobierno.

Ngem segun kadagiti dadaulo dagiti militante a grupo, mamatida nga adda plano ti Malakaniang a manggun-od iti ad-adu a bilang ti tugaw iti House of Representatives tapno maimameg iti sabali manen a posible a kaso ti impeachment maikontra ken ni Pres. Arroyo.

(Adda tuloyna)

Comments are closed.