Footer

Santacrusan, kadakkelan a parambak iti Mayo (maudi a paset)

5. Reyna Fe – isimbolona ti tagipatgen a pammati (virtue of faith) ta daytoy ti kaunaan a tagipatgen teolohikal (theological virtues). Adda awitna a krus.

6. Reyna Esperanza -isimbolona ti tagipatgen a namnama (virtue of hope), ti maikadua a tagipatgen teolohikal. Adda awitna nga angkla.

7. Reyna Caridad – isimbolona ti tagipatgen ti tulong (virtue of charity), ti maikatlo a teolohikal a tagipatgen. Adda awitna a puso.

8. Reyna Abogada – ti mangisaksakit kadagiti nakurapay ken mairurumen. Nakasuot daytoy iti nangisit a toga (panggraduasion) ken nakaiggem iti dakkel a libro.

9. Reyna Sentenciada – akmen ti nakuttong ngem nalibnos a balasang a kasla agruprupa nga inosente, ta isu ti mangisimsimbolo kadagiti inosente a nakombiktar iti basol. Dua a soldado a Romano ti nangbayabay kenkuana ken napungo dagiti imana.

10. Reyna Justicia – personipikasion ti “sarming ti hustisia”. Awitna ti kilosan ken espada.

11. Reyna Judith – irepresentarna ni Reyna Judith ti Pethulia a nangsalbar iti siudadna kadagiti Assyrians kalpasan a pinungsayna ti ulo dagiti nadangkok a ganggannaet. Awitna ti napungsay nga ulo ken espada.

12. Reyna Sheba – ti reyna a nangsarungkar ken ni Ari Solomon ken nagdaydayaw iti kinasirib, kinabaknang ken kinabileg ti ari. Adda awitna a jewelry box.

13. Reyna Esther – ti Hudeo a nangispal iti ilina iti pettat nga ipapatay ken pannakadadael babaen ti ibaballaetna ken ni Ari Xerxes. Adda awitna a setro.

14. Babai a Samaritana— ti babai a kinasarita ni Jesus iti bubon. Adda susuonna a karamba.

15. Veronica – ti babai a nangpunas iti rupa ni Jesus kabayatan ti via crusis. Naimarka ti rupa ni Jesus iti puraw a bandana, nga isu dayta ti makunkuna a “Shroud of Jesus” wenno “Shroud of Turin”. Agingga iti agdama ket maimatangan pay laeng dayta a bandana.

16. Dagiti Tres Marias – ni Maria iti Magdala, adda awitna a sangabotelia a bangbanglo; ni Maria nga ina ni Cristo Jesus, adda awitna a panio, ken ni Maria nga ina ni Santiago, adda awitna a sangabotelia a lana.

17. Dagiti Marians—a mangisimsimbolo kadagiti nadumaduma a pangiyaspingan ken ni Ina Maria:

a) umuna dagiti walo nga ubbing a nakaiggem iti saggaysada a letra nga A-V-E-M-A-R-I-A, a sarunuen dagiti babbalasang a mangisimsimbolo iti

b) Divina Pastora (Divine Shepherdess)

c) Reyna de las Estrellas (Queen of stars) – awitna ti maysa a wand a nagsinan bituen

d) Rosa Mystica – adda awitna a sangapug-ong a sabong ti rosas

e) Reyna Paz (Queen of Peace) – awitna ti simbolo ti kappia.

f) Reyna de las Propetas – adda awitna nga hour glass

g) Reyna Elena – ti mabigbigbig a reyna a binayabay ti maysa nga ubing a lalaki nga isu dayta ni Ari Constantino.

Kadagiti dadduma a prosesion, adda met bayabay dagiti amin a sagalas.

Kalpasan ti prosesion, maisaruno ti pabitin a pagraragsakan dagiti ubbing a laglagtuen.

Sakbay ti prosesion, gagangay a mailimed ti kinaasino dagiti sagalas ken ti kinaasino ni Reyna Elena tapno masorpresa dagiti tao nga agbuya. Dakkel a dayaw iti biang ti balasang no mapili a sagala wenno reyna ta kayatna a sawen a maysa kadagiti kalilibnosan iti lugarda.

Barong Tagalog ti suot dagiti konsorte idinto ta suot-Filipiniana dagiti babbai.

Iti tinawen, dakkel daytoy a piesta a daydaywen dagiti turista. Kaadduanna kadagiti agakem, lalo iti Metro Manila ket dagiti met laeng artista iti pelikula ken entablado.