Footer

Ti kontrobersial a DoJ secretary

Kadagiti amin a kameng ti Gabinete ni Presidente Gloria Macapagal-Arroyo, ni Sekretario ti Department of Justice Raul Gonzalez ti kakontrobersialan gapu kadagiti kapanunotan ken balikasna a masansan a mangted iti dakkel a pakaibabainan ti gobierno saan laeng nga iti imatang dagiti umili no di pay iti ganggannaet a pagilian.

Mangdakamattayo iti sumagmamano a kontrobersial nga isyo a nakaisawsawan daytoy a sekretario.

Kalpasan ti panangidatag ni United Nations human rights rapporteur Philipp Alston ti saan a makaguyugoy a reportna mainaig kadagiti pammapatay iti pagilian a mapapati nga adda pannakaibiang ti militar, kinuna ni Gonzalez nga awan ti karbengan daytoy a makibiang nga agimbestiga kadagiti pammapatay iti Pilipinas agsipud ta maysa laeng a babaonen ti UN.

Kasta man met laengen idi nangipila ni “Nicole” iti kaso a panagrames maikontra iti maysa a soldado nga Amerikano, adda dagiti waragawag ni Gonzales nga agdadata a mangpabpabor iti akusado ken mangibaba iti kredibilidad ti nagdarum.

Iti kaso ni US Peace Corps volunteer Julia Campbell a napapatay bayat ti panagbakasionna iti Sagada, imbes a mangiparuar iti pangandingay a balikas para iti pamilia ti biktima, binabalaw ketdin ni Gonzalez ti biktima agsipud ta “no saan a ti kinamanagbaybay-ana”, saan koma a napasamak ti krimen.

Ti kaudian, idi Abril 22, iti sanguanan dagiti barangay captains ti Iloilo City, inwaragawagna nga ikkanna iti P10,000 tunggal barangay a mangited iti 12-0 a butos kadagiti kandidato ti administrasion para senador iti eleksion inton Mayo 14.

Ken ni Gonzalez, saan a panaggatang ti butos ti inkarina a P10,000 kadagiti kapitan ti barangay, no di insentibo laeng. Malaksid dayta, awan ti sinalungasingna a paglintegan ta saan met a kandidato ken saan nga agtaud ti kuarta manipud iti pundo ti gobierno agsipud ta kaibatogan laeng ti “insentibo” ti maysa a panagapit iti talon ti asawana.”

Sumangkautro met daytoy Executive Secretary Eduardo Ermita ta kinunana ketdin nga awan ti dakes iti imbalikas ni Gonzales agsipud ta “panangannongna laeng iti politikal a lideratona,” ken saan a maparitan dagiti kameng ti Gabinete a mainbolbar iti partisan politics agsipud ta dinutokan ida nga opisial ti Presidente nga isu met ti lider ti politika iti majority party.”

Masirib nga abogado ni Gonzalez ket ammona la ketdi nga iti babaen ti Omnibus Election Code, maikonsidera ti inaramidna a panaggatang iti butos.

Ala, imbilinen ti Commission on Elections ti inbestigasion mainaig iti daytoy a kontrobersial nga imbalikas ni Gonzales a nagbalinen a dakkel nga isyo politikal.

Ditoy ti pangipakitaan ti Comelec nga ipatpatungpalna dagiti linteg uray no asino ti mabadbaddekan.

Iti sabali a bangir, saan koman nga urayen ti Malakaniang ti panagtunged ti inbestigasion ti Comelec mainaig daytoy nga isyo.

Rumbeng laeng a palubosannan ni Gonzalez.

Ti saludsod: maaramid ngata ti Malakaniang dayta iti sanguanan ti pammaliiw nga “sagrado a baka” ni Gonzalez a saan a mabalin a maisakripisio iti altar ti integridad ti hustisia iti pagilian?

Comments are closed.