Footer

District engineer naitabon, awan pay natiliw a suspetsa

SAN JUAN, Ilocos Sur – Naitabon iti bigat ti Mayo 3 ti napapatay nga asawa ti maysa a mayoralty candidate ditoy ngem awan pay ti tiniliw ti polis a nangisayangkat iti krimen.

Ngem  kinuna ni Candon City chief of police Supt. Rey de Peralta a mangiparuarda iti cartographic sketch dagiti suspetsa kas maibasar iti panangiladawan dagiti kaopisinaan ni Engineer Percival Bitonio, District Engineer ti Ilocos Sur Second Engineering District ti Department of Public Works and Highways, Candon City, a pinaltogan ti dua a lalaki a mapapati a gun for hire iti mismo nga opisinana.

Kinuna ni de Peralta nga ipakitada pay kadagiti saksi ti ladawan dagiti guns for hire tapno maammuan no isuda ti nangisayangkat iti pannakapapatay ni Bitonio.

Tallo nga anggulo ti kitkitaen dagiti inbestigador ti Candon City PNP a posible a nakaigapuan ti pannakapapatay ni Bitonio: trabaho, negosio ken politika.

Iti inisial nga inbestigasion ti polis, kinuna ti drayber ni Bitonio a dua a lalaki a nagpabigbig a taga-Cervantes, Ilocos Sur ti nangbirbirok ken ni Bitonio bayat ti lunch break idi Abril 18.

Intulod pay ti drayber dagiti dua iti opisina ti district engineer.

Idi pimmanaw ti drayber, nangegna a nailitek ti serradura ti ridaw ti opisina ni Bitonio ket nagparikna kenkuana nga adda dakes a gagem dagiti dua isu a nagpatulong iti watchman.

Ngem idi asidegdan iti opisina ti district engineer, nakangegda iti putok ket nagpaknida ta awan armasda.

Rimmuar dagiti suspetsa ket kasla awan aniaman a rimmuarda iti pasdek.

Iti pannakiuman kenkuana ti maysa a broadcaster ti maysa a lokal a radio station, naiyebkas ni retired district supervisor Amelia Bitonio, asawa ti biktima ken kandidato a para mayor ditoy nga ili nga “awan met ti ammomi a basolmi iti kakaduami, iti kakailianmi, … dayta laeng no pakabasolanmi daytoy inkam panagtaray iti daytoy umay nga eleksion.”

Ngem insungbat ni incumbent mayor Benjamin Sarmiento a nadalus ti konsensiana ket ni panunot, saanna a maaramid ti alegasion ni Bitonio.

Dinawat pay ni Sarmiento a “daytoy nga eleksion ket saan nga isu ti pakasinasinaantayo” idinto nga indagadagna a “no patien dagiti kakailiak a dakami wenno siak ti akin-aramid, saandak nga ibutosen, pangngaasida,” ngem no saanda a patien, “tulongandak met a mangvindicate iti naganko babaen ti panangbutosda ken panangitedda met laeng iti talekda kaniak.”

Independent candidate ni Bitonio idinto nga iti babaen ti Lakas-CMD ti partido ni Sarmiento.

Nagsangon dagiti dua iti eleksion idi 2004 ngem inabak ni Sarmiento ni Bitonio.