Footer

Mayor, nakaawat iti pangta iti biagna

SANTIAGO, Ilocos Sur – Impulong ti incumbent mayor ditoy iti polis nga adda naawatna a text message a mangipangpangta kenkuana ken ti pamiliana.

Iti pulongna iti polis, kinuna ni Mayor Josefino Miranda, Jr. a nakaawat iti text message manipud iti cellphone number 0917-5683268 a nangpangta kenkuana ken iti pamiliana.

Kastoy ti mapapati a sinaguday ti text message: “Mayor, naimbag a bigatmo.  Adda nasagapmi nga damag nga maysa nga grupo dagiti kapitanes ti kimontak kadagiti NPA tapno umayda iraid ta balaymo.  Nakabusorda kenka ta ikamkampanyam kano nga saan nga ibotos ti tao ida.  Pati kano ti pamilyam iramanda ken pati kano panaggatangmo ti botos ket riribukenda.  Dayta kano anakmo a kandidato ipadukotda.  Isu nga agannadka.”

Iti interbiona iti DZTP Radio Tirad Pass, kinuna ni Miranda a saanna a patien a maaramid daytoy dagiti kakapitan agsipud ta kakadduana ida.

Kinunana pay nga adda panagkikinnaawatanda kadagiti kakapitan gapuna a saanna a patien nga adda dakes a panggep dagitoy kenkuana.

Sumagmamano a kakapitan ti nangbuangay iti grupoda nga inawaganda iti Magdalo ket limada a nagkandidato para konsehal iti sangguniang bayan ditoy.

Kabayatanna, kinuna dagiti kakapitan nga awan ti kinapudnona ti nasao a text message idinto a nainget a pinaglibakanda nga isuda ti akin-aramid iti mensahe.

Kinuna ni Kapitan ti Olo-Olo Ador Ellorin, maysa kadagiti kandidato para konsehal, nga awan ti kinapudnona ti nasao a text message agsipud ta nagkandidatoda tapno agserbi kadagiti umili saan ket a mangaramid iti riribuk.

Kasango ni Miranda, kandidato ti Lakas-CMD, ni Jovito Ellorin, kandidato ti Kampi, para mayor iti daytoy nga ili.