Footer

Negosiante, hinold-ap nakamotor a lallaki

STA. MARIA, Ilocos Sur – Iti baet ti nainget a kampania ti kapolisan a gun ban, naiwayat latta ti panaghold-ap ken pammaltog iti daytoy nga ili.

Maysa a negosiante a babai ti hinold-ap dagiti armado a lallaki iti provincial road a saklaw ti Poblacion Sur ditoy idinto a napaltogan ti maysa a residente iti Danuman iti daytoy met laeng nga ili.

Inreport ni Leonida Cabradillla, 43, naasawaan, residente iti Poblacion Sur ditoy nga intaray dagiti hold-aper ti kuartana, ti alahasna nga agpateg iti P150,000, PCIB check nga aggatad iti P12,000 ken dadduma pay a napapateg a dokumento.

Segun iti inbestigasion, agawiden ti biktima a nakalugan iti chop-chop motorcycle ket agdaldaliasat iti provincial road a saklaw ti Poblacion Sur idi dinungpar dagiti suspetsa a naglugan iti Honda XRM motorcycle ti likud ti luganna.

Nagsardeng ti biktima ngem pinaturongan dagiti suspetsa iti paltog sada sinibbarut ti bagna a nakaipalaonan ti kuarta, alahas, tseke ken dadduma pay a dokumento.

Naglibas dagiti suspetsa iti laud a direksion a sumalpot iti national highway.

Nangipatulod dagiti polis ditoy iti flash alarm ken nagsawarda ngem saanda a nasarakan dagiti hold-aper.

Kabayatanna, pinaltogan ti di nabigbig a tao ni Simplicio Soria, 44, naasawaan, residente iti Danuman West ditoy itay lawasna.

Segun iti report, iluklukat ti biktima ti sango a ridaw ti pagtaenganda idi manipud iti kasipngetan timpuar ti suspetsa sana pinaltogan ti biktima.

Nagsagaba ti biktima iti sugat iti bakrangna ket naitaray iti Central Ilocos District Hospital.

Shotgun ti mapapati a naaramat iti pammaltog.

Di pay ammo no ania ti motibo ti pannakapaltog ti biktima.