Footer

NPA, awanan panangilalana iti biag – militar

SAN JUAN, Ilocos Sur – Ti pannakapapatay ti maysa a konsilman ti barangay ti mangipakita a ti New People’s Army ket awanan panangilala iti biag ti tao.

Daytoy ti pablaak ti 50th Infantry Batallion ti Philippine Army kas sungbatna iti naipablaak a panangako ti Alfredo Cesar Command, NPA-Ilocos, a ti grupoda ti nangisayangkat iti pannakapapatay ni Richard Tatson, konsilman ti sitio Caset, Barangay Maradodon, Cabugao, Ilocos Sur idi Abril 14.

Sumagmamano a lokal nga estasion ti radio ti pinatulodan ti Alfredo Cesar Command iti daytoy a pablaakda.

Iti sungbat a pablaak ti 50th IB, PA nga immuna a naibasa iti programa a Timek ti Soldado, kinunana a “ti dusa a patay nga inyetnag ti kangaroo a korte ti NPA…” ket pammaneknek a ti komunista ket “dina bigbigen ti kalintegan ti tao wenno human rights a kanayon nga ipukpukkaw dagiti party-list organizations a Bayan Muna, Anak-Bayan, KMU, Anak-Pawis ken Gabriela.”

“Daytoy a pasamak ket mangipakita iti komunista nga NPA ket awanan panagbuteng iti Dios, awanan respeto iti agdama a gobierno, awanan panangilala iti biag ti tao, dina bigbigen ti indibidual a kalintegan ti tao ken maysa a puersa a mangikuskuspil kadagiti marigrigat ken awanan gaway nga umili,” kinuna ti pablaak.

Lima nga armado a tattao ti nangpapatay ken ni Tatson iti pagtaenganna idi rabii ti Abril 14 gapu iti mapapati a panagipatulodna iti impormasion iti militar kas kameng ti Barangay Intelligence Network.

Natay a sigida ni Tatson gapu iti sugatna iti barukong, abaga, kannawan nga ima ken luppona manipud iti cal. 5.56 kas maibasar iti uppat a kapsula a nasarakan iti nakapasamakan ti krimen.

Segun iti pablaak ti Alfredo Cesar Command, NPA-Ilocos, a pinirmaan ti maysa a Ka Miguel Cervantes, “ni Richard Tatson ket napaneknekan a nagbasol iti rebolusionario a tignayan gapu iti pinasetna kas napeklan a Kameng ti Barangay Intelligence Unit iti lugarda…”

Kinuna pay ti pablaak a “dagiti impasana (Tatson) nga impormasion iti kabusor ket nangted iti peggad ken dangran dagiti umili ken iti puersa ti NPA.”

Ngem insungbat ti 50th IB nga “iti agdama, agsapsapul dagiti naulila da Konsehal Richard Tatson ken Jerry Igme iti naan-anay a hustisia” idinto a sinaludsodna no ayan ita dagiti militante a grupo a “mangipukpukkaw nga isuda dagiti mangilablaban iti kalintegan dagiti marigrigat”  ken “apay a nagbalinda a tuleng, bulsek ken inutil kadagitoy a napasamak?”

Kinondenar pay ti pablaak ti Karapatan ken Ilocos Human Rights Advocates “nga agim-imbestiga kadagiti engkuentro (NPA ken soldado) ken kakastoy a pasamak gapu ta “awan ti aksionda iti pannakaranggas dagiti biktima.”

Binabalaw pay ti pablaak dagiti lokal a gobierno ti Sinait ken Cabugao maigapu iti mapapati nga awan aksionda mainaig kadagiti pammapatay.

“… Apay nga agintutuleng ken aginbubulsekda iti kastoy a pasamak ta awan man laeng aksionda tapno maikkan hustisia dagiti biktima? Wenno napatpateg kadi ti eleksion ngem ti biag dagiti tattao iti bukodda a lugar wenno inutilda kadi iti bukodda a lugar a mabutbuteng iti NPA?” sinaludsod pay ti pablaak.

Inyunay-unay ti pablaak a “ti biag ti kapatgan a sagut ti Dios ditoy rabaw ti daga sana indarirag nga “intayo koma dayawen ken raemen tapno maragpat ti naan-anay a talna ken kappia a tulbek ti naragsak a panagbiag.”