Footer

Senior citizen, biniktima ti Budol-budol Gang

CANDON CITY – Kuarta ken alahas ti napukaw ti maysa a senior citizen iti Budol-Budol Gang a mapapati nga agdakdakiwas ditoy a siudad.

Nagpulong iti polis ni Puring Cabanilla, residente iti barangay San Isidro ditoy nga intaray ti maysa a grupo dagiti lallaki ken babbai ti kuartana a P150,000 ken alahas nga agpateg iti P50,000.

Segun iti biktima, tallo a babbai ken dua a lalaki dagiti nangloko kenkuana.

Iti interbio kenkuana ti DZTP Radio Tirad Pass, kinuna ni Cabanilla a kagapgapuna a nakimisa iti simbaan idi sinabet ti maysa a lalaki ken babai ket imbagada nga adda pasarabo ti anakna nga agas kenkuana.  

Kinuna ti biktima a namati kadagiti dua agsipud ta am-ammoda dagiti annakna.

Segun iti biktima, kimmuyog kadagiti suspetsa iti sango ti Candon City Hospital.    

Kinunana a maysa kadagiti suspetsa ti nagpatulong no kasano ti ag-withdraw iti bangko.

Insingasing ti maysa nga alaenna ti libritona tapno maisurona no kasano ti ag-withdraw.

Napan innala ni Cabanilla ti libritona sada nagturong iti Equitable PCI Bank ket  nangiruar ditoy iti P50,000. Nagturongda pay iti Bank of Commerce ket inyaonna ti P100,000.

Kinuna ti biktima nga idi naiyaonna ti kuarta, kinuna dagiti suspetsa a mapanda mangted iti donasion iti simbaan. Imbatida kano ti bag a naglaon iti kuartada.

Nagur-uray ti biktima ngem saanen a nagsubli dagiti suspetsa. Idi kitaenna ti imbati dagiti suspetsa, naduktalanna laengen a nakartib a pappapel dagitoy.  

Addan sumagmamano a kaso dagiti residente ditoy nga inallilaw ti Budol-Budol Gang.