Footer

2 napapatay, 2 nasugatan iti pamunpon

BANTAY, Ilocos Sur – Makalawas sakbay ti eleksion, dua a tattao ti natay idinto a nasugatan ti dua pay iti panagtambang a naisayangkat bayat ti pamunpon iti kalsada nasional a saklaw ti Barangay Aggay itay Mayo 8 ditoy.

Napaltogan da Romeo del Castillo, 39; Barangay Kagawad Robert Pe Benito, 38; Barangay Kagawad Salvador Pira, 65, ken Emely Pe Benito, 14, agpapada nga agnaed iti Barangay Capangdanan ditoy bayat ti pannakipamunponda iti pimmusay a kalugaranda.

Naitaray dagiti uppat iti Metro Vigan Cooperative Hospital ngem natayen a naidanon da del Castillo ken ni Kagawad Pe Benito.

Ngem kinuna ni Chief of Police ditoy Arsenio Ramos nga awan pakainaigan iti politika ti panagtambang. Kinunana a kitkitaenda ti anggulo a panagibales a motibo ti krimen.

Nakasarak dagiti inbestigador iti 7 a kapsula manipud iti cal. 45 iti nakapasamakan ti krimen.

Segun iti maysa a dina kayat painaganan a saksi, daldaliasaten dagiti nakipamunpon ti kalsada nasional ket iti asideg ti nagkurusan ti dalan nga agturong iti San Julian, Bantay, nagsardeng ti maysa a motorsiklo a nagluganan ti dua a tattao a nakahelmet sada nagpaputok.

Iti kigtotda, nagtataray dagiti nakipamunpon ket nagubbuay iti trapiko iti nasao a lugar.

Mapapati a ni del Castillo ti puntiria dagiti nagtambang a masuspetsa a gun for hire ket nairamraman laeng dagiti tallo pay a biktima.

Naglibas dagiti suspetsa iti direksion nga agturong iti San Julian, Bantay. Saan a nasarakan ida dagiti nagresponde a polis.

Iti pannakaisurat daytoy, di pay nabigbig dagiti nagisayangkat iti krimen.