Footer

Adu dagiti dimmatag, adu dagiti nagkamtud

Iti pastoral letter a naibasa kadagiti nadumaduma a simbaan iti arkidioses ti Manila idi napan a bulan, imbinsabinsana dagiti innem a saguday a masapul nga ikut ti maysa a kandidato a pagbatayan dagiti botante a mangbutos kenkuana.

Ania dagitoy a saguday?

  • Daydiay mangipatpateg ken agbuteng iti Dios.
  • Daydiay mangsursurot iti nadalus a konsensiana ken kanayon a sensitibo iti panagpili no ania ti nasayaat.
  • Daydiay agbibiag ken awanan pangadua nga agserbi babaen ti moral a prinsipio.
  • Daydiay naasi, saan a suitik ken saan a nadamsak.
  • Daydiay mangrespeto ken mangsalaknib kadagiti limitado a pagbiagan iti nakaparsuaan ken mangipetteng kadagiti dadduma nga aramidenda met daytoy.
  • Daydiay nakasagana nga agsakripisio iti personal, partido wenno grupo nga interes para iti panagmaymaysa, talna ken panagdur-as ti pagilian ken dagiti umili.

Ita ti saludsod: mapataran kadi dagiti kandidato amin dagiti nadakamat a saguday?

Nakitatayo bayat ti kampania ti panangtallikud dagiti sumagmamano a kandidato iti partidoda gapu ta saanda a naakomodar ket bimmallasiwda iti sabali a partido iti baet iti nainget a panangkritikarda iti dadaulo ti nasao a partido.

Nakitatayo ti panagtritrinnaidor dagiti kandidato kadagiti kapartiduanda tapno laeng umangat ti ranggoda.

Nakitatayo ti kasla awan aniamanna a panaggasto dagiti kandidato iti kuarta tapno lumagto ti ranggoda ket lumsotda iti winning circle malaksid laeng kadagiti pammutbuteng, pammapatay ken panaglabsing kadagiti paglintegan iti baet dagiti palagip manipud iti Simbaan ken nadumaduma a sektor a mangidardarirag iti nadalus ken natalna nga eleksion.

Masaludsod: Ania la unay ti naiyarkos iti puesto a pagngayangayanda tapno iti naimbag man wenno dakes a pamuspusan ken uray asino ti agdepdeppa, masapul a matagikuada daytoy?

Nupay paglibakanda, kaadduanna kadakuada ti nagkandidato saan a gapu ta agserbida no di gapu iti bileg, turay ken dagiti adu a pagimbagan ken pribiliheo a naikawes iti dayta a puesto.

Iti daytoy a pagbatayan, ad-adda a nakapappapati a no maipasungalngalda iti narikut a gundaway a kasapulan a pagpilianda ti interes ti pagilian ken ti bukodda nga interes, ti naud-udi ti ipangrunada a salakniban.

Ala, kayattayo man wenno saan, dimmatag dagitoy “mamasirib”, “pagwadan”, “mannakabael”, “natudio”, “nanumo” a “kabsat, ama, ina, gayyem ken adipen” nga “agserbi para iti panagdur-as dagiti umili, ti ili, probinsia ken pagilian.”

Patientayo man ida wenno saan ken iti baet nga iti kaaduda a dimmatag, adu dagiti nagkamtud, agbutostayo ta daytoy ti karbengantayo kas umili. Iti daytoy laeng a gundaway a maipamatmattayo ti pudpudno a kaririknatayo mainaig kadagiti mararaem nga intay butosan.