Footer

Ex-kapitan ti barangay, napaltogan, natay

CANDON CITY – Maysa nga ex-kapitan ti barangay ti natay kalpasan a  pinaltogan ti saan a nabigbig a suspek iti barangay San Nicolas, ditoy.

Nabigbig ti biktima a ni Cesar Bonson y Tolentino, residente iti barangay San Pedro iti daytoy a siudad ngem   taktakuaten pay laeng dagiti pannakabagi ti linteg ti kinaasino ti nangpaltog kenkuana.

Segun iti inbestigasion ti polis, madama ti panaginom ti biktima ken dagiti kakaduana a da Oscar Tejada, 53; Joselito Biala, 45;  ken Roger Gacusan, 46, agpapada a residente iti San Pedro ken ni Danilo Reynante, 37, iti pagtaengan ni Tejada idi bigla nga immasideg ti nakaabungot a lalaki iti likudan ti biktima sana pinaltogan daytoy.

Nagtataray dagiti agiinom iti butengda ket idi agsublida, nakitada laengen ti biktima a nakadata iti daga nga addaan sugat iti ulo ken likudna.

Intaray dagiti pannakabagi ti linteg ti biktima iti ospital ngem naideklara nga awanen ti biagna.

Naglibas ti suspetsa kalpasan ti pammapatay.

Di pay ammo no ania ti motibo ken no asino ti nangisayangkat iti pammapatay.