Footer

Kasano nga ayaten ti kabusormo? (Umuna a paset)

AYATEM ti kabusormo a kas iti panagayatmo ‘ta bagim.  Iti matter-of-factly, awan ti makatungpal daytoy. Kasano nga ayatem ti kabusormo, nay? Kabusormo ngarud, di dimo ayaten? No ay-ayatem, di saanen a kabusor? Ngem, ti nalawag a kayat a sawen daytoy, kailian, no ayatem ti kabusormo, iruangamo ti inkay panagkappia tapno mapukaw ti guranggura. Ta no adda gura iti nagbabaetan awan kappia. Ket no awan ti kappia, nariribuk ti panagbiag. Asino ti mayat iti nariribuk a panagbiag?

Maysa pay ketdi daytoy a paradox kadagiti inaramat ni Apo Jesucristo kadagiti pannursurona. Kasano aya  nga agpayso nga ayaten ti kabusormo?

Kabusormo ngarud, kasano ngay nga ayatem? Saanen a kabusor no inka ayaten. Inayatmo  ngaruden gayyemmon, saanen a kabusor ti pakaibilanganna.

Ngem apay  ngarud nga adda daytoy a paradox ken mangited iti anag ti biag? Ania dagiti kaipapanan daytoy?

Adtoy man, kakabsat, ti maysa a pakasaritaan a maiyannatup la unay a generalization.

Tallo a lallaki dagiti annak ni Andy ken Rochelle. Ni Jun ti inaunaan. Agtengnga ni Jeremy. Buridek ni Flint.

Nupay negosiante dagiti agassawa, adda latta  panawenda kadagiti annakda. Saan a pasig a trabaho wenno negosio ti adda iti isipda no di inikkanda met iti naiprograma a panawen para kadagiti  tallo nga annakda nga addan iti estado ti kinaagtutubo.

Nairuam dagiti agassawa a damagen kadagiti annakda no ania ti naaramidanda a nasayaat iti makalawas.

“Ania ti naimbag a  naaramidanyo iti padayo a tao itoy a lawas?” daytoy no kua ti saludsoden dagiti nagannak iti kada week-end nga inda panagdedenna iti agmalmalem.

Mabilbilangen a mapasamak iti pamilia daytoy a klase ti saludsod.

Iti panangidisso kadagiti tagipatgen (values) napukawda agraman dagiti mangipapaay iti sinninged ken ad-adda pay a tibker iti maysa a pamilia.

“Daydiay kapipintasan amin a naaramidanyo ti ibagayo. Mangpilikayo iti maysa  laeng,” kuna ti ina kalpasan nga indissona dagiti taraonda iti lamisaan: cake ken ice cream para kadayta agalasdies iti aldaw.

“Idi kalman, nakapidutak iti sobre. Nabungkong ti sobre.”

“Ania ti linaon ti sobre?” magagaran ti ina.

“Kuarta, mommy!”

“Ania ti inaramidmo?” binagi met ti ama.

“Adda pay linaonna a papeles.”

“Sadino ti nakapidutam?” binagi ti nagtengnga.

“Iti kalsada?” ti kimmot.

“Saan! Iti uneg ti taxi!”

“Ket ania ngarud ti inaramidmo iti napidutmo?” inulit ti ama ti saludsodna.

“Nabasak iti maysa kadagiti naisigpit a papel ti adres ti makinkukua. Intulodkon a!”

“Pudno la unay a naimbag a banag dayta  nga  inaramidmo, anak!” kuna ti ina ken ti ama ket pinalakpakanda ti anak.

“Dinamag pay ti nangisubliak no asino dagiti nagannak kaniak…”

“Ta apay kano?”

“Ipagpannakkelnaka dagiti nagannak kenka  ta addaanka iti naimbag a sursuro, kunada man!”

“Pudno dayta, kunam, anak. No maidayaw ti anak,   mairaman dagiti nagannak. Isu a taginayonenyo ti agaramid iti kinaimbag…” kuna ti ina.

“I’m very proud of you, son!” ket kinuso pay ti ama ti tuktok ti inaunaanna.

(Adda tuloyna)

Comments are closed.