Footer

Legal deparment ti Comelec: Kandidato pay laeng ni Goulart

CAOAYAN, Ilocos Sur – Kandidato pay laeng ni  mayoral candidate Germie Singson-Goulart ken balido a mabutosan iti masungad nga eleksion.

Daytoy ti panangilawlawag ti legal department ti Commission on Elections, Manila mainaig iti isyo ti diskualipikasion ni Goulart nga impaulog ti First Division ti nasao a poll body itay nabiit.

Sakbayna, kas sungbatna iti petision ti uppat a residente ditoy iti babaen ti Llanes et. al vs. Singson-Goulart a nangkiddawanda iti Comelec a madiskualipika ni Goulart, nangipaulog ti First Division ti poll body iti resolusion a nangpaboranda iti petision idinto nga imbatadna a “gapu ta agserserbi pay laeng a city councilor (ni Goulart), impakitana nga awan ti intensionna a mangabandonar iti residensiana iti Vigan.”

Ngem kinuna ti legal department ti poll body a masuspende ti pannakaipakat ken implementasion ti nasao a resolusion ti First Division kalpasan ti madagdagus a panangipila ti abogado ni Goulart iti motion for reconsideration.

“Ngarud, agingga a saan a dismisen ti Commission En Banc ti nasao a resolusion, wenno ibasura ken agbalin a pinal ken executory, kandidato pay laeng ni Ms. Germelina Singson Goulart ken balido a mabutosan iti masungad a May 14 elections,” inlawlawag ti legal department ti Comelec.

Kanaig daytoy, kinuna ni Goulart a saan pay a nalpas ti disqualification case a naipila kontra kenkuana iti Comelec agsipud ta aglasat pay iti adu a proseso.

“Daytoy a desision a naggapu iti First Division, saan pay a pinal, saan pay a maipatungpal agingga iti maipan, makadanon iti Commission En Banc ti Comelec,” kinuna pay ni Goulart.

Iti motion for reconsideration nga impila ni Goulart, inkalinteganna a kas sagudayen ti Seksion 38 ti Rep. Act 9006, “asinoman a nabutosan nga opisial, nasional man wenno lokal, a nagipila iti certificate of candidacy para iti isu met laeng wenno iti sabali a puesto ket maikonsidera a naglusulos iti opisinana.”

Kandidato ni Goulart iti babaen ti Partido Kampi idinto a Lakas-CMD ti partido ni Mayor Mario Tugade.

Comments are closed.