Footer

Mangurostayo latta

NAKAIRUAMAN ni Katoliko ti manguros: no rummuar wenno umulog iti balay, sakbay a rugianna ti aramidenna, no mamendision kadagiti ubbing nga agmano kenkuana, sakbay ken kalpasan nga agkararag, iti Nasantuan a Misa ken amin a sakramento.

In nominee Patris, et Fili, et Spiritus Sancti. Amen. Wenno: Iti nagan ti Ama, ti Anak ken ti Espiritu Santo. Amen.

Ngem katkatawaan wenno pagang-angawan dagiti ‘self-proclaimed’ a propeta iti agdama a panawen ti pananguros ni Katoliko, Anglican, Lutheran ken Orthodox. Dagiti mamasirib iti sirok ti kamatis. Dagiti mamasirib a propeta a bumbumsog ti petakada kadagiti tithing.

Apay kadi a mangurostayo? Ta kadagiti mapukaw, kinamaag ti mensahe maipapan ti pannakatay ni Cristo iti krus. Ngem kadagiti maisalakan, daytoy ti pannakabalin ti Dios.

Kas kuna ti Nasantuan a Surat: ‘Dadaelekto ti sirib dagiti mamasirib, ket ikkatekto ti pannakaawat dagiti nasaririt. Ania ngarud ti serbi dagiti mamasirib? Wenno dagiti agipalpalawag iti Linteg? Wenno dagiti nalaing a makidinniskutir iti agdama a panawen?’ (1Cor 1:18-19).

Dagiti nalaing a makidinniskutir, tiniritirda ti alipuspos dagiti naiyaw-awan babaen kadagiti nasam-it a tagapulot iti ngiwatda ngem nabileg a sabidong ti agaon iti pusoda.

Apay a mangurostayo? Tanda daytoy ti pannakimaymaysatayo iti Namarsua babaen iti Trinitarian formula wenno maymaysa a Dios iti tallo a persona – ti Ama, ti Anak ken ti Espiritu Santo. Isu a no mangurostayo, kunatayo metten nga igiddan: Iti nagan ti Ama, ti Anak, ken ti Espiritu Santo.

Kadagiti ‘nalaing ken mamasirib a makidinniskutir’ uyawenda ken pagang-angawanda dagiti manguros. Kasano ngata ti panangirakurakda (kas iti kunada) iti Sao ti Dios babaen ti panaguyaw ken panagang-angawda iti sabali?

Saan a nalawag ti inda pagserbian no ti Sao ti Dios wenno ti panangdadaelda iti ladawan ti sabali lalo no di met ida bibiangan dayta a ‘sabali’.

Ngem kas kalawag ti agmatuon a ti panangdadael iti sabali ket awid a sallabay kadagiti nakapuy. Ta narigat met ti sao a sao nga awan ti dumngeg. Tapno adda dumngeg, nasken a rurosen wenno barsaken ti nabunga tapno adda sangkapidut nga inka met ipasindayag wenno idiskutir nga addaanka met iti bunga.

No mangurostayo, saan laeng a maipapan iti Trinitarian formula ti sumeksek iti muging no di maipalagip pay ti panagtuok ni Cristo iti krus. Ta kas kunana: awitenyo ti krusyo ket sumurotkayo kaniak.

Iti inaldaw-aldaw, no mangurostayo, awittayo ti krus ni Cristo iti mugingtayo. Adda kadatayo ni Cristo a naibayog iti krus. Dumawattayo iti bendision.

No mangurostayo sakbay nga agtrabahotayo, adda kadatayo ti Mannakabalin. Inun-unatayo ti panagdayaw kenkuana sakbay ti aramid.

Iti Galacia 6:14, “Nupay kasta, iti biangko ti laeng krus ni Apotayo a Jesu-Cristo ti pagpasindayagko; gapu iti krusna, natay ti lubong kaniak, ket natayak met iti lubong.

Ngarud naglawag: no manguros, iproklamar ti pannakaisalakan ken ti panagtuok ni Cristo iti krus.

Ken maibilang a panangdadael iti kanito ti pannakidinniskutir kadagiti mamasirib ken nalalaing a makidinniskutir.

Sasaurmo ti makiaay-ayam iti agserserbi iti dua a bileg: ta isanggana ti maysa kasta man met laengen ti sabali.

Comments are closed.