Footer

Dagiti lilibeg a party-list organizations (Tuloyna)

Kas panangibasurana iti petision ti dua a non-government organization a nangkiddawanna iti Comelec a ruk-atanna ti listaan dagiti nominees, inkalintegan ti Comelec a paritan ti linteg a mangiwaragawag kadagiti nominees dagiti party list groups kas sagudayen ti RA 7941 wenno party-list law.

Ngem kinuna ti Korte Suprema nga awan ti pakabasaan iti RA 7941 a maparitan ti Comelec a mangiparuar iti nagan dagiti nominees no di laeng iti certified list iti kaaldawan ti eleksion.

Kaarig maysa a tungpa ti pammilin ti Korte Suprema iti Comelec gapu iti “saan nga umisu a panangbasana iti nasao a linteg.”

Agparparang a “kinillo” ti Comelec ti nalinteg a probiso ti nasao a linteg. No ania ti rason, dagiti laeng opisial ti nasao a poll body ti makaammo.

Ngem di nakakaskasdaaw nga agsuspetsa dagiti non-government organizations nga adda panagpadas a panangilemmeng kadagiti nominees dagiti party list groups.

Ket iti panangiparuar a kapilitan ti Commission on Elections iti listaan dagiti nominees dagiti nadumaduma a party-list groups, napatalgedan ti kaadda dagiti tattao ken grupo a mapapati nga asideg ti asosasionda iti administrasion ken dida irepresentar dagiti marginalized sectors kas intuyang ti RA 7941.

Iti listaan dagiti party-list groups, dagitoy ti maagsaw:

Biaheng Pinoy, grupo dagiti agpaspasada iti traysikel. Nailanad ditoy a ni Jesus C. Cruz, bise mayor iti Mandaluyong, ken Arsenio S. Abalos dagiti dua a kangrunaan a nominees. Iti umuna a panagkita, awan ti pagduaduaan iti nasao a grupo ta maibilang ngarud a marginalized sector dagiti traysikelan. Ngem dagiti dadaulo a nominees ditoy ti kueskuestionaran dagiti non-government organizations agsipud ta bise mayor iti Mandaluyong ni Cruz idinto a maysa a doktor ni Abalos, kabsat met ngarud pay ni Comelec chairman Abalos.

Ti saludsod: Kasano nga ibagi ti maysa a bise mayor ken doktor dagiti agpaspasada iti traysikel?

Iti maysa pay a petitision, innaganan ni party-list representative Etta Rosales ti Ahon Pinoy, Babae Ka, Ang Kasangga, Akbay Pinoy, Aksa (Aksyon Sambayanan), Agbiag, Biyaheng Pinoy, Aangat Tayo, Anak ( Aangat ang Kabuhayan), Anad (Alliance for Nationalism and Democracy), ken Kakusa, a front ti Malakaniang.

Taldiapantayo dagiti nominees dagitoy a grupo a mapapati nga associated iti Malakaniang, kas iti panagsukisok ti maysa nga aginaldaw a pagiwarnak:,

  • AHON Pinoy – Dante Francis Ang II, Bernardo Ople (kabsat daydi Sen. Ople), Ernesto C. Herrera, anak ni Ernesto Herrera, pangulo ti TUCP: 
  • Akbay Pinoy OFW – National Inc. (APOI) – Melchor Rosales, retired general, DILG undersecretary for peace and order
  • AGBIAG – Marcelo T. Fariñas II, asst. secretary, Office of External Affairs, Office of the President; Samuel V. Tomas, PNP arms supplier
  • Alliance for Nationalism and Democracy (ANAD) – Ruben R. Platon, executive director ti Phil. Public Safety College, DILG.
  • AHON BAYAN – Edgardo C. Manda – director, Laguna Lake Dev. Authority; Roden C. Sakaluron – dati a mayor ti Cotabato; ken Antonio Mariano C. Almeda – horse trainer ni Cong. Mike Arroyo.
  • Alliance of Rural Concerns – Narciso D. Santiago III, anak ni Sen. Miriam Defensor-Santiago
  • Bigkis – Sheryl G. See – anak ni Ephraim Genuino ti Pagcor
  • NEELFFI – Hussein P. Pangandaman – anak ni Agrarian Sec. Nasser Pangandaman.
  • BANAT – Salvador B. Britanico; Raul Lambino, dadaulo ti Sigaw ng Bayan a nangipagna iti Charter Change.
  • ABA-AKO – Percival C. Chavez – chair ti Presidential Commission for Urban Poor.
  • AA-Kasosyo – Felix Brawner Jr. – kabsat ni Commissioner Romeo Brawner – (nagipila iti withdrawal ngem di pay inikkat ti Comelec).

Ania ti maagsaw kadagitoy a nominees?

  • Adu dagiti party-list groups ti idauluan ti propesional ken nangato ti tukad ti yanda a sektor ken saan a makurkurangan iti biag tapno maibilangda koma iti marginalized sector.
  • Adda dagiti dadaulo a nominees ti adda iti gobierno ken addaan iti nangato a saad iti pay met opisina ti Malakaniang.
  • Sumagmamano kadagiti nominees ti retirado nga opisial ti militar, maysa ti ak-akusaran dagiti militante a grupo nga adda iti likudan dagiti extra-judicial killings.

Ti dakkel a saludsod: Kasano nga ibagian dagitoy ti sektor a nakaikappenganda ket saanda met a makuna a nagtaud wenno paset ti nasao a sektor?

Yan ti imas wenno rigatna, saan nga inaksionan ti Korte Suprema ti petision dagiti dua nga NGOs a mangdiskualipika iti 32 a party list groups gapu iti alegasion a frontda iti Malakaniang ken saanda nga irepresentar dagiti marginalized sector a rumbeng nga ibagianda.

Iti daytoy a senario, agparparang a maab-abuso ti party-list system iti pagilian ket sinerrek dagiti agtuturay ken nangato ti saadna a tattao tapno laeng maibayog ti bukodda nga interes.

Rumbeng laeng a diskualipikaen ti Comelec dagitoy a party-list groups.

Karit daytoy iti Comelec a masapul nga ikkanna iti naan-anay nga imatang ken aksion. No saan, ad-adda laeng a bumaba ti nababa la ngaruden a kredibilidad ti nasao a poll body gapu kadagiti kontrobersia a nakaisawsawanna iti napalabas.

Comments are closed.