Footer

Kasano nga ayaten ti kabusormo? (Tuloyna)

“Ania met ti inaramidmo a naimbag iti padam a tao, Jeremy?”

“Idi Huebes, bigbigat a napanak nagdiaging sadiay igid ti baybay.. Adda grupo nga agdidigos. Adu pay ti kaduada nga ubbing…”

“Ket yanna ti kinaimbag nga inaramidmo?” kinuna ni Jun.

“Agtartarayak iti dandani matapliakan ti danum idi adda nagiikkis iti likudak. Agpapaarayatda. Idi taliawek ida, itudtudoda ti lumned-tumpaw iti taaw. Saanakon a nagpangadua ket inarayatko ti malmalmes.”

“Insalakanmo?”

“Kasta ngarud, mommy! Ubing a lalaki. Nagpatengnga iti baybay a dina ammo ti aglangoy.”

“Ania ti inaramidmo?”

“Linangoyko nga insalakan. Intakdangko sako inaplayan iti artificial resuscitation. Kasta unay ti yaman dagiti kakaduana idi naungaran ti ubing.”

“Nalaingka ti artificial resuscitation?”

“Inadalmi iti boyscout idi. Ken naimbag la ketdi ta sinuruannak ni papa nga aglangoy ken no kasano ti agalaw iti malmalmes.”

“Very good no natandaanam amin a naisuro kenka, anak. Pudno met a naimbag ti naaramidam.”

“Palakpakantayo ni Jeremy!” kuna ti ama  ket pinalakpakanda ti umis-isem  nga anak.

“Ni met Flint ti agistoria!”

“Napanak nakiaay-ayam idta kabarongbarongan idi kalman…”

“Aysuska! Ket no kinabilnaka la ngaruden daydiay a barrairong nga ubing! Ania ti naganna itayen? Dagul? Wen, Dagul! Napanka pay laeng?” immulagat ti ina.

“Nasubegka met , ading…” kuna ni nagtengnga.

“Dimo ammo ti agnakem. Amangan no di laeng kabil ti masagrapmo, patayendaka pay!” binagi ni inaunaan.

“Urayentayo nga agistoria. Ditay unaan…” kuna ti ama. “Ala, ituloymo no ania dayta a kinaimbag nga  ibagbagam.”

“Agaayamkami iti basketbol idi napasungadanmi a naliday ni Dagul. ‘Ita man pay a makarikna iti liday ti siga?’ kuna dagiti kakaduak. Ket dinamagda no ania ti gapuna. Imbagana  nga agsakit kano ti kabsatda a buridek. Intay man kitaen, kunami idi. Ket nagtataraykami a napan iti barongbarongda. Nakitami a pumpunasan ni Nana Bansiang ti masakit a nakailad iti datar. Nabara ni Ambit ken aggurigor kano.”

“’Painumenyo iti agas, nana no aggurigor, nakunak,”’ ngem nagngilangil ni Nana Bansiang nga awan kano ti igatangda iti agas. Kinautko ti bulsak ket intedko amin a kuarta a linaon ti walletko. Kunak pay kadagiti kakaduak a saankamin nga agmerienda ta itedmi laengen ken ni Nana Bansiang. Immayonda  met. Nagdardaras ni Nana Bansiang a napan gimmatang iti agas ti anakna.”

“Ket ania ti sumaruno a napasamak?” kuna ti inaunaan.

“Intuloymi  ti nagbasketbol!”

Nagkatawa dagiti nagannak.

“Idi agawidak, inasitgannak ni Dagul, ket nagyaman. Nagkari a dinakto kanon saksaktan ta aggayyemkamin.”

“Naimbag dayta nga inaramidmo, anak. Nasken nga ipariknam ti ayat iti kabusormo…” kuna ti ama.

“Wen, husto dayta. Ti ayat ket parmekenna amin, uray dagiti kabusor. Ta  saan a maparmek ti kabusor babaen ti panangbutbuteng wenno babaen ti puersa no di babaen laeng ti ayat ken panangiparikna kadaytoy.”

“Husto ti inaramidmo, Flint, anak, kinaimbag ti agayat iti kabusor.”

“Isu a nawayaakon a mapan agay-ayam idta kabarongbarongan nga awan ti pakaan-anoak, daddy, mommy. …”

ITI sarsarita, makitatayo ti nagduduma a wagas ti ayat. Ngem kangrunaan iti amin no kasano ti panangparukma iti kabusor.

Isu a no kuna ti paradox nga ayatem ti kabusormo a kas iti panagayatmo iti bagim, nasken nga  iparikna dayta a sipupuso.

Ti panangayat iti kabusor ket panangited iti panagkappia. No yawat ti kappia iti naimbag a wagas, maisaruag dayta a kappia ket dumteng ti kinaragsak. Agtultuloy iti kinatalinaay a panagbiag. Ayat ti kangrunaan iti amin ditoy sirok ti init…